（受权发布建议彝文版）ꍏꇭꍏꑷꇩꂱꎆꏣꌋꆀꐧꋦꀻꎆ ꉬꈎꄐꎖꊯꉬꃢꌠꏤꄻꃆꂮꇖꐨ

ꍏꇩꇭꍣꄈꑍꊏꈭꌠꍏꑷꊈꑼꉼꇖꃢꌠꐊꈴꃀꈿꇬꃹꅼꃅꇩꈐꇩꉈꃅꒊꃅꇁꎥꃪꄉ，ꇩꂱꎆꏣꌋꆀꐧꋦꀻꎆ“ꊯꉬꉬ”ꄐꎖꏤꄻꌠꏭꇖꐨꄚꐰꋋꈨꄜꎼꇁ。

ꋍ、“ꊯꉬꉬ”ꊬꌠꆹꀑꐱꃅꐧꋦꉪꏦꐛꏀꈴꌠꃅꇫꑟꌠꀋꉬꀋꉆꊭꌠꉬ

（1）“ꊯꇖꉬ”ꊬꌠꇬꉪꇩꏤꀻꎆꌠꊌꐨꀉꒉꀊꂾꌠꊌꅜ。“ꊯꇖꉬ”ꊬꌠꉪꇩꏤꀻꎆꈴꎁꆹꐋꀋꌡꐯꐋꀋꌡ、ꎃꀋꐚꐯꎃꀋꐚ。ꌼꇪꌼꀖꌠꇩꏹꃅꒊꃅꇁꌋꆀꊋꋠꃣꇖꌠꇩꈐꄺꀱꀻꎆꎍꐽꂿꃆꊝꇬ，ꐋꀨꑮꏣꀻꈯꄜꃅꄉꌠꄈꍏꑷꆏꄈꑭꊂꇩꏤꑭꊂꊿꋅꈁꐥꌠꏓꂱꋌꋯꑌꏃꂠꌊꄉ，ꊋꋠꊝꄉꀒꁨꂵ、ꈐꊟꊋꊡꄉꀒꁨꆹ，ꃅꋊꇵꆅꀉꇨꃅꄜꎟꌠꐕꄽꄉ，ꇿꋌꐥꃅꃨꆰꐨꀉꒉꀊꂾꌠ꒔ꑞ꒔ꑵꋓꎭꌠꊜꄻ，ꄈꌋꆀꇩꏤꌤꑘꄹꇙꌊꊌꐨꀉꒉꀊꂾꌠꀊꏀꌠꊌꅜ。ꎆꏣꒈꇁꌠꎍꐽꇈꀒꁨꆹ，ꊇꁧꀊꂥꃅꀻꎆꌠꏟꈯꃅꄹꎆ；ꈆꑪꇮꇐꏀꀺꊌꐨꀉꑌ，ꊈꏀꒃꅐꊋꃤꄔꐽꃅꀻꎆ；ꐊꑷꃅꃹꅼꃅꄺꀱꌠꀒꁨꋍꁘꃅꄹꎆ，ꑟꐨꀊꂥꃅꉇꉻꏭꁉꃑꌠꀋꆏꃅꍔꒉ；ꈴꎁꇬꃅꏓꂱꋯꁦꌠꃹꅼꃅꀻꎆ，ꐊꑷꃅꏦꈴꇩꏲꌠꇿꋌꐥꃅꃄꌬ；ꁱꀕꌤꑘꌋꆀꁱꀕꅐꑘꍅꁍꀕꃅꀻꎆ，ꉌꊈꁱꀕꅐꇐꋲꑞꀉꑌ；ꉹꁌꐥꐨꏦꀧꌠꏟꈯꈫꈈ，ꎭꇔꈢꇓꀖꌠꊌꐨꄻꈫꈈꍔꐯ；ꀊꃴꌋꀁꂥꉹꏮꌠꑭꁘꐕꐳ，ꒆꉻꋦꈭꊇꁧꐪꊛꄉꄻꃪ；ꇩꏤꋬꂻꄐꊋꇿꋌꐥꃅꉀꐕ，ꐧꋦꏱꄻꂿꄐꀉꇨꇁ，ꐧꋦꃅꇴꄉꉻꎍꐽꌠꄝꀋꊰ；ꇩꐏꌋꆀꂽꋈꄻꌠꁨꎆꐨꀉꒉꀊꂾꌠꊌꅜ；“ꋍꇩꑍꏦ”ꃄꄻꌠꃹꅼꃅꄹꎆ；ꍏꇩꐛꐨꇩꏤꀉꒉꉇꉻꑌꑲꌠꐊꑷꃅꍔꐯ；ꐊꑷꃅꏦꇨꃅꄈꏱꄻꌠꊌꐨꄇꇖꀕꌠꊌꅜ，ꍹꈔꌠꏭꁏꉈꈽꌠꃹꅼꅉꏯꉜꄉꄹꎆ，ꄈꅿꀹꄻꊋꃤ、ꏓꋧꊋꃤ、ꌉꈿꊋꃤꄇꇖꀕꃅꉀꐕ。ꉪꇩꏤꎆꏣꊋꃤ、ꈆꑪꇮꇐꊋꃤ、ꏓꇱꇩꊋꐂꀊꏀꊐꇬꃹꆹ，ꍏꇩꈁꏦꐛꏀꈴꌠꑭꁘꀊꏀꌠꐕꈬꃅꐕꎼꆹ，ꉐꈎꑍꂷꂶꌠꉈꈽꁻꌐꈭꈜꀊꏀꌠꇬꂂꄻꂂꌠꃅꇫꑟ。ꊌꐨꀉꒉꀉꂿꋋꈨꊌꅜꌠꆹ，ꁢꊧꆏꐋꀨꑮꏣꀻꈯꄜꃅꄉꌠꄈꍏꑷꈜꏁꈜꍜꌭꄉꊌꌠꉬ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꈆꑪꃅꄐꏁꄉꊌꌠꉬ。

（2）“ꊯꉬꉬ”ꊬꌠꆏꀑꐱꃅꐧꋦꉪꏦꐛꏀꈴꌠꃅꇫꑟꌠꈴꎁꇬꂴꊪꊁꊛꌠꉆꈉꀋꂿꑘꌠꐥ。ꐧꋦꉪꏦꐛꏀꈴꌠꃅꇫꑟꌠꆹꅂꊐꌡꃅꊛꄉꁨꆹ、ꀋꆏꃅꀻꎆꁨꎆꌠꐩꋊꈴꎁꏢꉬ，ꀋꆏꃅꊋꇤ、ꊛꄉꉈꈽꄻꅐ。“ꊯꉬꉬ”ꊬꌠꆹꀑꐱꃅꐧꋦꉪꏦꐛꏀꈴꌠꃅꇫꑟꌠꇬꅉꃀꌆꈬ、ꐊꑷꃅꊋꇤꌠꀋꉬꀋꉆꑠꊭꉬ，ꂱꎆꅑꌠꄻꈫꈈꀹꎆ、ꆹꊎꏢꑲꌠꀜꋊ、ꀋꇎꀋꂪꊋꁧꅉꅋꑣꀉꇨ，ꇩꏹꋓꅔꃛꅉꇬꄉꄐꇐꏤꁈꑴꇙꐨꊌꅜ，ꍏꇩꈁꏦꐛꏀꈴꌠꃅꇴꄉꉻꇬꃆꂮꐥꌠꄐꇐꏤꁈꂿꃆꀉꒉꃅꂵꊌꌠꄹꇙ，ꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꅉ꒜ꀊꅰꃅꈫꈈꌠꌆꄻꌶ。

（3）“ꊯꉬꉬ”ꊬꌠꉪꇩꏤꀻꎆꋦꈭꆹꃹꅼꃅꌼꇪꃅꐛꐈꌠꊝ。ꇩꏤꀉꒉꌠꐮꃆꂮꆹꇩꏹꃅꒊꃅꇁꇬꈺꇙ，ꇩꏹꃅꒊꃅꇁꐛꐈꌠꆹꃹꅼꃅꇩꈐꀻꎆꌠꇬꁧꏖ，ꉪꇩꏤꀻꎆꌠꆹꄐꇐꏤꁈꊜꋽꄮꌋꆀꃨꆰꐨꋓꎭꌠꋍꋓꃅꐥ、ꊨꀋꄅꄤꎖꊋꌠꐊꊈꁦꎆꇁꑠꊭꇬꎍ。ꇩꏹꇬꈴꄉꉜꇬ，ꋧꃅꉐꈎꐛꁏꐨꐳꀥꇱꄉꐛꐈ，ꇩꏹꊋꃤꐯꌟꉜꌠꃹꅼꃅꋊꄻ，ꀊꏀꈭꌠꈆꑪꇮꇐꇝꂱꌠꌋꆀꅐꑘꆴꐈꌠꐳꀥꇱꄉꂵꅐ，ꉪꇩꏤꆹꑴꇙꃅꇩꏹꈥꈉꊭꄎ、ꉇꉻꋦꈭꄺꂡꇬꈲꁧꐥꌠꐊꊈꀉꑌꃅꐥ。ꋍꈭꐨ，ꋧꃅꃣꎓꈌꐡꌠꐯꌼꐯꀖꎍ、ꇙꈧꑘꀋꒃꌠꀊꅰꃅꃛꇁ，ꃅꄷꐮꏯꄉꌠꅐꈝꐮꅐꀉꑌ；ꋍꁁꏯꉪꏦ、ꀧꌋꃅꉪꏦꀑꐕꇁ，ꊋꃷꇱꉪꏦꌋꆀꌅꈌꇂꇎꍔꍞꇷꇋꌠꉀꎆ，ꇩꏹꎆꏣꃼꇇꐥꀹꋓꎭꐨꃛꇨꌠꊝ，ꋧꃅꎆꏣꉀꎆꇙꊋꀋꇎ；ꇩꏤꀉꒉꌠꐮꄙꌠꀊꅰꃅꌼꇪꃛꇨ。ꇩꈐꇬꈴꄉꉜꇬ，ꉪꇩꏤꎆꏣꅉ꒜ꎍꐽ、ꂱꎆꅑꐨꀉꑌ、ꍕꎇꐨꀉꇨ、ꊋꂫꀉꒉ，ꀊꉗꃅꉾꆹꌠꄘꄏꇎꏦꌋꆀꅉꀨꆸꄟꐛꀋꐈ，ꍏꇩꐛꐨꐧꋦꉪꏦꄹꏦꂱꎆꅑꐨ、ꄉꈁꀉꒉꐯꀉꒉꌠꃷꎏꂱꎆꅑꐨ、ꐛꒆꌠꅐꑘꉻꑫꂱꎆꅑꐨ、ꀉꑌꌠꌧꊿꅐꀦꂱꎆꅑꐨꀊꅰꃅꇫꅐꇁ。ꋍꈭꐨ，ꀻꎆꐨꐮꆽꀋꏣꇎꀋꋒꌠꌤꃆꄡꇗꀉꇨꃅꇫꐥꑴꌦ；ꇿꋌꐥꌠꈉꐨꀋꇎ，ꇩꈐꀰꏮꀉꒉꌠꋍꅉꇊꅉꐥ；ꇙꊋꏀꆹꏭꆦꂿꃆꊋꋠ；ꂿꑘꂿꑘꁡꇤꐛꏀꈴꌠꊼꇅꊁꊰ；ꃅꅍꊌꌠꌋꆀꀀꊿꊌꐨꉀꎆꌠꍅꊋꊼꇅꀉꒉ，ꉹꁌꐥꐨꏦꀧꌠꀋꇎꅉꊋꁧꅉꐥ；ꊻꂷꐛꉻꐛꐈꌠꆏꎆꏣꀻꎆ、ꐧꋦꏱꄻꑠꏭꎥꄝꀊꏀꌠꄜꎼꇁ；ꀋꉬꀋꉆꁁꏯꃨꆰꉮꐴꐥꑴꌦ。

ꐛꁏꌠꆹꊜꋽꄮꄚꈐꏭꐊ，ꋓꎭꌠꆹꉌꊋꋌꌾꃑꎼꇁ。ꄈꑭꊂꃅꃹꅼꃅ“ꑍꑵꏤꄻꄉ”ꌠꏤꇽꐨꐥꌠꈻꇐꉪꐚ，“ꇖꑵꉪꐨ”ꀉꇨꇱ、“ꇖꑵꑴꑇ”ꌠꑌꈬ、“ꑍꑵꀧꌋꃅ”ꌠꃅꇫꑟ，ꄐꇐꏤꁈꏤꊋꄝꀋꊰ，ꊊꎂꀕꌠꉌꊋꀉꇨꇱ，ꏣꀋꑌꃅꐛꐈꌠꌧꐛꐈꌠꊝꐛꐈꌠꎹ，ꉈꈽꀬ、ꉈꈽꇮ，ꀬꅑꃅꆲꁏꒈꂃꄓꌠꄷꀋꁧꒊꊞꃅꃴꂤꌠꀉꒉꀊꂾꃅꎖꉚꌠꏭꊝ，ꐩꋊꑴꇙꉌꊈꌌꊋꋠꌠꑣ、ꃨꆰꌠꄙ、ꋓꎭꌠꊝ，ꊋꃤꏓꋧꄉꊨꏦꌤꀞꋒ，ꐪꊛꄉꎆꏣꐳꃅꀻꎆꌠꌋꆀꐧꋦꀊꉗꃅꎍꐽꌠꊿꋌꇰꌠꀉꒉꋋꑍꐘꀊꏀꁬꁰꄻ，ꊋꇤꄉꍏꇩꈁꏦꐛꏀꈴꌠꋈꄻꌠꐛꊂꀊꏀꌠꀹꄻꌶ。

ꑍ、“ꊯꉬꉬ”ꊬꌠꇬꎆꏣꐧꋦꀻꎆꌠꄐꇺꌐꏦꌋꆀꀋꉬꀋꉆꌠꁻꌐ

（4）“ꊯꉬꉬ”ꊬꌠꇬꎆꏣꐧꋦꀻꎆꌠꄐꇺꉪꇐ。ꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌭꈬ，ꐊꑷꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꃄꌬꈴ，ꃹꅼꃅꄈꅿ꒜ꀉꒉꑍꊏꃢꌠꌋꆀꑍꊏꈭꈁꐥꃢꌠꐊꈴꃀꉌꊈꃄꌬꈴ，ꐊꑷꃅꐧꋦꉪꏦꐛꏀꈴꌠꇩꏤꀉꇨꌠꋈꄻꐛꌠ、ꉐꈎꑍꂷꂶꌠꉈꈽꁻꌐꃅꇫꑟꌠꇬꆼꒆꄉ，ꍏꇩꈁꏦꐛꏀꈴꌠꌌꐊꑷꃅꍏꉸꊿꋅꇰꀋ꒜ꃅꀱꌄꆣꇁꌠꄹꎆ，ꏓꇲꃅ“ꉬꑵꋍꉻ”ꏓꇱꄐꉻꄹꎆ，ꋮꄮꃅ“ꇖꑵꐊꑷ”ꄐꇐꄐꉻꄹꎆ，ꇩꈐꇩꉈꃅꇴꄉꉻꀉꒉꑍꂷꌠꏓꇲ，ꐛꒆꊒꌸꐊꑷꃅꀻꎆꉪꉻꀊꏀꌠꃄꌬꈴ，ꐳꃅꀻꎆꐛꊂꀊꏀꌠꏓꄻ，ꎍꐽꅉꇬꄉꀒꁨꆹꌠꎹꌠꌤꃅꈁꉬꅉꃀꉉꈌꌭꈬ，ꎆꏣꋈꄻꌠꌌꈯꄜꃅꄉꌠꌭꈬ，ꊇꁧꀊꂥꃅꀻꎆꌠꄹꇙꌠꌌꅇꀨꃅꄉ，ꄺꀱꏀꀺꌠꌌꊇꅉꇙꊋꃅꄉ，ꏓꂱꋍꑍꋍꉙꃅꉀꎆꌠꐥꐨꉾꃪꌠꈉꐨꇬꇎꄻꌠꌌꊇꅉꁻꌐꃅꄉ，ꐊꑷꃅꏦꇨꃅꄈꏱꄻꌠꌌꊇꅉꏦꀧꅍꃅꄉ，ꎆꏣꊇꁧꇿꋌꐥꃅꉀꐕꌠꌋꆀꃷꁨꄉꄐꃅꉀꎆꌠꄹꇙ，ꊿꐊꑷꃅꀻꎆꌠ、ꏓꂱꈁꐥꌠꃅꐯꇯꌣꈚꇁꌠꑭꁘꏟꈯꃅꐕꎼꆹꌠꄹꇙ，ꀑꐱꃅꐧꋦꉪꏦꐛꏀꈴꌠꃅꇫꑟꌠꁨꎆꐨꏤꇽꐨꐥꌠꊌꅜꌠꄉꀧ。

（5）“ꊯꉬꉬ”ꊬꌠꇬꎆꏣꐧꋦꀻꎆꌠꀋꎪꃅꍬꌬꌶꌠꏥꏦ。

——ꄈꐊꑷꃅꏲꂠꌠꌭꈬ。ꏟꈯꃅꄈꍏꑷꋦꒉꐨꌋꆀꏓꋧꋍꃱꃅꏲꂠꌠꀧꌋꃅ，ꄈꃅꍜꌭꌠ、ꃅꇴꄉꉻꏂꇫꌠ、ꏱꁈꏤꄻꌠ、ꄺꀱꌠꊥꎆꌠꄐꊋꉀꐕ，ꄈꅿꏃꂠꌠꌌꎆꏣꐧꋦꀻꎆꌠꋍꑞꋍꁁꏯꈴꎁꇬꃅꐊꈴꌐꄉ，ꉪꇩꏤꐧꋦꉪꏦꐛꏀꈴꌠꋈꄻꌠꎁꃅꊇꅉꄉꀧꌠꇲꁵ。

——ꏓꂱꉎꀋꐥꌠꌭꈬ。ꏓꂱꀨꄜꉆꈉꁌꒉ，ꏟꈯꀕꃅꏓꂱꉘꇉ，ꏓꂱꊇꅉꈲꁧꀧꌋꃅ，ꐧꋦꐽꊯꑗꉬꌠꊥꎆ，ꀻꎆꌠꇬꄉꉹꁌꐥꐨꏦꀧꌋꆀꄻꃪꌠꉜꁨ，ꉹꁌꐥꐨꈉꐨꇬꇎꈴꌠꇬꄉꀻꎆꈥꈉꍔꀺ，ꎆꏣꌋꆀꐧꋦꋮꄮꃅꀻꎆꌠ、ꐥꇐꌧꑳꌋꆀꉌꊈꌧꑳꐯꈲꐮꄻꌠꄹꇙ，ꐛꏀꈴꌠꋈꄻꊌꐨꁳꀊꅰꀉꑌꃅꀊꅰꐽꊯꃅꏓꂱꋍꏅꌠꇬꈲꎻ。

——ꊇꁧꀊꂥꃅꀻꎆꌠꌭꈬ。ꀻꎆꉪꉻꀊꏀꌠꌌꀻꎆꌠꄐꏁ，ꑞꃅꋭꌠꑞꃅꃅꊈꏀꒃꅐꊋꃤꀻꎆ，ꇩꈐꀰꏮꀉꒉꌠꄻꀉꇨ，ꇩꈐꇩꉈꀰꏮꑍꑵꌠꄻꁣꀋꐥꃅꄉ，ꈒꇓꈉꐨꍔꒉꌠꌋꆀꃹꅼꃅꇲꁵꁁꏯꐛꉻꐨꐥꃅꄺꀱꌠꏓꇲ，ꐳꃅꇙꊋꀊꏀꌠꉘꉚ，ꎆꏣꐛꉻꄻꃪꊐꐕꌠꊥꎆ，ꉀꎆꃷꁨꄻꃪ、ꊭꊎꃷꁨꀰꏢꐛꀕ，ꎆꏣꐪꊛꄉꉾꃪꃅꀻꎆꌠꌋꆀꐧꋦꐊꑷꃅꀻꎆꌠꄹꇙ。

——ꐊꑷꃅꃹꅼꃅꄺꀱꌠꌭꈬ。ꊇꁧꀊꂥꃅꀻꎆꌠꇬꏢꑲꌠꏦꉻꉺꏦꇊꑴꇬꉜꄉ，ꃹꅼꃅꄺꀱꌠꄹꎆ，ꑟꐨꀊꂥꃅꁉꃑꌠꍔꒉ，ꒃꅐꐮꃆꂮꌋꆀꒃꅐꊋꃤ、ꄩꇴꄩꉻꌋꆀꎆꏣꅉ꒜、ꇩꏤꏱꄻꌠꌋꆀꐧꋦꀻꎆꌠꀊꅰꉾꃪꃅꐮꄉꄐꌠꄹꇙ，ꐪꊛꄉꀻꎆꇙꊋꌋꆀꐧꋦꍄꑐꊋꃤꄻꀉꇨꇁ。

——ꇿꋌꐥꌠꃷꎏꌋꆀꄐꅍꐥꌠꍔꃚꐮꐊꐙꌠꌭꈬ。ꋒꐯꋒꃅꃷꎏꅐꀦꁆꄻꌠꇬꏤꇽꐨꐥꌠꂿꄐꋊꇤ，ꀊꅰꉾꃅꍔꃚꂿꄐꋊꇤ，ꋍꃱꃅꌠ、ꁉꃑꌠ、ꋓꅔꌠ、ꊱꁨꌠꃷꎏꉻꑫꏓꄻ，ꏦꏲꎆꏣ、ꉌꒊꎆꏣꋈꄻ，ꃷꎏꈴꏦꏲꈴꇩꏹꈴꌠꀰꏢꃼꇇꃅꋦꈭꋍꉎꀋꐥꌠꄺꑣ，“ꃑꌊꍄꑐꄎ”ꉈꑴ“ꏲꌊꉾꄎ”ꌠꎆꏣꐥꀹꏓꐛ。

——ꀻꎆꌋꆀꋬꂻꏓꇲꌠꌭꈬ。ꀻꎆꌠꇬꄉꋬꂻꌠꄻꈫꈈ，ꋬꂻꌠꇬꄉꀻꎆꌠꏂꇫ，ꉱꑟꉪꏣꄻꀉꇨ，ꇿꋌꐥꃅꋍꑞꋍꉹꃨꆰꐨꄴꏮꋊꑣ，ꎆꏣꌋꆀꐧꋦꍕꎇꐨꄻꀉꇨ，ꋬꂻꐛꊂꀊꏀꌠꌌꀻꎆꐛꊂꀊꏀꌠꏦꀧ。

（6）“ꊯꉬꉬ”ꊬꌠꇬꎆꏣꐧꋦꀻꎆꌠꀋꉬꀋꉆꌠꁻꌐ。

——ꊇꁧꀊꂥꃅꀻꎆꌠꊌꐨꄇꇖꀕꌠꊌꅜ。ꎆꏣꉀꎆꌠꄉꄐꅉꇬꎍꌠꄝꀋꊰ，ꈁꉬꐊꊈꒃꅐꐨꎍꐽꃅꉀꐕ，ꀀꊿꌬꈧꐨꄇꇖꀕꃅꉀꐕ，ꈒꇓꈉꐨꎆꏣꉀꎆꌠꇬꈺꇙꌠꀨꄜꇙꊋꂿꄐꐪꊛꄉꀉꇨꇁ，ꎆꏣꉀꎆꊋꂫꋒꐯꋒꃅꄝꃑꎼꇁ，ꇩꏤꑭꊂꋍꃱꃅꐙꌠꃷꎏꀉꒉꌠꋈꄻꌠꃹꅼꅉꏯꉜꄉꄹꎆ，ꄉꈁꀉꒉꐯꀉꒉꌠꃷꎏꂱꎆꅑꌠꐪꊛꄉꄇꇖꀕꃅꅐꇁ，ꀊꏀꉹꌠꇮꑘꈴ、ꈴꌗꈴ、ꇓꈓꏦꎫꐛꈴ、ꂿꑘꐛꏀꈴꌠꁨꎆꐨꀉꒉꀊꂾꌠꊌꅜ，ꊈꏀꒃꅐꊋꃤꀻꎆ、ꀻꎆꐛꊂꀊꏀꌠꏓꄻ、ꐛꏀꈴꎆꏣꉻꑫꋈꄻꌠꂵꅐꐨꀉꒉꀊꂾꌠꊌꅜ。

——ꈆꑪꇮꇐꑴꋦꑴꇨꌠꑟꐨꀉꒉꃅꉀꐕ。ꇩꏤꏀꀺꉻꑫꉻꄜꇿꋌꄇꇖꀕꃅꉀꐕ，ꂘꑘꈆꑪꇮꇐꌧꊿꋍꉻꃅꀻꎆꌠꐛꊂꀑꐱꃅꄻꐛ，ꅉꃀꎥꃪꌠꌋꆀꇬꀦꏀꀺꌠꄐꊋꄇꇖꀕꃅꀉꇨꇁ，ꀋꉬꀋꉆꁁꏯꀋꉬꀋꉆꌠꈯꄜꇮꇐꐳꃅꂵꅐ，ꀥꐯꏡꀥꂴꅑꌠꁁꏯꄇꇖꀕꃅꁦꎆꇁ，ꈆꑪꇮꇐꏀꀺꌠꌋꆀꅐꑘꏀꀺꌠꃹꅼꃅꐮꏓꐊ，ꏀꀺꅸꇙꂿꄐꄇꇖꀕꃅꀉꇨꇁ。

——ꀒꁨꋍꁘꃅꐊꑷꃅꃹꅼꃅꄺꀱꌠꂵꅐꐨꀊꏀꌠꊌꅜ。ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꃹꅼꃅꄹꎆ，ꐧꋦꉪꏦꃷꎏꎆꏣꏦꉻꀊꅰꃅꉾꃪ，ꑟꐨꀊꂥꃅꉇꉻꏭꁉꃑꌠꏦꉻꉺꏦꀊꅰꃅꐛꒆ，ꈴꎁꇬꃅꏓꂱꋯꁦꌠꄹꏦꈴ、ꏦꐛꈴ、ꈭꎁꈴꌠꑟꐨꀒꁨꋍꁘꃅꉀꐕ，ꐧꋦꉪꏦꏦꏲꇩꏤꋈꄻꌠꑟꐨꀊꅰꀊꂥꌠꇬꑟ。

——ꐧꋦꌧꑳꑟꐨꄇꇖꀕꃅꉀꐕ。ꁱꀕꑴꑇꌠꀊꅰꃅꏟꈯ，ꈯꀨꉪꇐꈋꍣꌠꀋꆏꃅꈫꈈꇁꀉꇨꇁ，ꐧꋦꉪꏦꈯꄜꁌꐨꉜꐨꀊꐯꈭꃅꃄꄻ，ꊿꋅꈁꐥꌠꁱꀕꏀꀺꀹꄻꍄꑐꊋꃤꀋꆏꃅꄖꄑꎼꇁ，ꏓꂱꉌꊈꁱꀕꐥꐨꀊꅰꃅꀉꑌꇁ，ꍏꉸꊿꋅꏓꋧꊋꃤꌋꆀꍏꉸꁱꀕꑌꑲꊋꃤꄇꇖꀕꃅꀉꇨꇁ，ꇩꏤꆓꊋꃤꐪꊛꄉꉀꐕ。

——ꏓꂱꐥꐨꊇꁧꀋꆏꃅꉀꐕ。ꊇꁧꀊꂥꃅꋒꐯꋒꃅꃅꅍꊌꌠꁨꎆꐨꀊꏀꌠꊌꅜ，ꀀꊿꊌꐨꉀꎆꌠꌋꆀꎆꏣꉀꎆꌠꋍꋓꃅꐙ、ꑘꃅꃄꎆꉀꐕꌠꌋꆀꑘꃅꒃꅐꐨꉀꐕꌠꋍꋓꃅꐙ，ꁷꄻꐛꉻꉾꃪꇁ，ꊌꐨꐧꀠꏠꌠꊿꁥꌠꐪꊛꄉꍔꒉ，ꐧꋦꏦꀧꄹꏦꀊꅰꃅꉾꃪꇁꀊꅰꃅꐪꊛꉆ，ꅉꀨꄉꉻꁧꃤꃅꌠꐽꏡꈴꑟꐨꄇꇖꀕꃅꉀꐕ。

——ꎔꃨꍏꇩꋈꄻꌠꁨꎆꐨꀉꒉꀊꂾꌠꀊꏀꌠꊌꅜ。ꀊꃴꒃꅐꐥꐨꐤꄟꀑꐱꃅꏓꐛ，ꌋꋊꑞꅉꑟꁻꌐꏤꈉꈐꃅꃅꇫꑟ，ꁦꎴꌋꀁꂥꋬꂻꇿꋌꀊꂥꌠꀊꏀꉹꌠꊋꀦꉻꑫꀑꐱꃅꄻꐛ，ꀋꉬꀋꉆꌠꍍꇐꋊꃑꈁꉬꃷꁨꐪꊛꄉꊨꒊ，ꒆꉻꉻꑫꀉꑌꑵꃅꐙꌠꎍꐽꃅꐙꌠꐪꊛꃅꐙꌠꀋꆏꃅꉀꐕ。

——ꇩꏤꋬꂻꇊꑴꀊꅰꃅꈫꈈ。ꇩꏤꋬꂻꉻꑫꌋꆀꄐꊋꀒꁨꋍꁘꃅꀉꇨꇱ，ꀋꉬꀋꉆꁁꏯꃨꆰꐨꊌꌌꇿꋌꐥꃅꄴꏮꋊꑣꇧꎭ，ꐧꋦꏱꄻꌠꌋꆀꄉꉻꋬꂻꏱꄻꑟꐨꄇꇖꀕꃅꉀꐕ，ꂽꄻꐛꋍꉐꈎꐛꌠꉈꈽꁻꌐꏤꈉꈐꃅꃅꇫꑟ，ꑟꐨꀊꅰꀊꂥꃅꋬꂻꍏꇩꋈꄻꌠꏟꈯꃅꄹꎆ。

ꅉꃀꋋꈨꀂꏽꄉꉈꑴꃅꐎꉬꈎꉈꈽꄉ，ꅑꅸꑍꄙꆀꌕꊯꉬꈎꑟꇬꆏꉪꇩꏤꎆꏣꊋꃤ、ꈆꑪꇮꇐꊋꃤ、ꇩꐏꊋꃤ、ꏓꇱꇩꊋꌋꆀꇩꏹꑌꑲꊋꃤꀉꒉꃅꉀꐕꌠꃅꇫꑟ，ꊾꂷꐽꏡꃅꇬꇩꈐꒃꅐꈁꉬꁌꐨꆏꐧꀠꏠꌠꐞꄿꇩꏤꑟꐨꇬꑟ，ꏓꂱꀊꅰꃅꐥꌒꄻꌒ，ꀑꐱꃅꐧꋦꉪꏦꐛꏀꈴꌠꃅꇫꑟ。

ꌕ、ꐛꏀꈴꌠꅐꑘꉻꑫꋈꄻ，ꐥꄜꎆꏣꐴꊧꄻꈫꈈꄻꀉꇨ

ꐛꏀꈴꅐꑘꉻꑫꆹꍏꇩꈁꏦꐛꏀꈴꌠꐥꇐꇮꇐꅉ꒜ꉬ。ꎆꏣꀻꎆꌠꊋꏿꅉꄻꐥꄜꎆꏣꀂꏽꐕꄉꌠꌭꈬ，ꀑꊋꃅꐙ、ꀊꃴꃅꐙ、ꐮꏓꐊꃅꐙꌠꃅꍜꌭꈬ，ꐳꃅꄺꑣꀉꇨꌠꇩꏤ、ꊇꁧꀉꇨꌠꇩꏤ、ꃅꈯꐚꈴꀉꇨꌠꇩꏤ、ꈭꈜꀉꇨꌠꇩꏤ、ꈄꏍꀉꇨꌠꇩꏤꋈꄻ，ꄺꂡꑘꍆꐪꋭꋽꌠꄝꀋꊰ，ꂴꅑꄺꂡꑘꌌꈯꌬꃅꄉꌠꐛꏀꈴꅐꑘꉻꑫꏓꄻ。

（7）ꋊꃅꐥꌠꅐꑘꄻꃪꉀꐕ。ꅐꑘꀋꉬꀋꉆꌠꊈꐕꊐꐕꌠꄹꇙ，ꇑꑘ、ꎷꏸ、ꐈꇐꇮꑘ、ꏾꇮꑘ、ꋩꍹ、ꏸꏧ、ꆳꂾ、ꋉꃆꑠꅐꑘꅉꆺꑭꊂꅐꑘꁷꃅꌠꇬꉆꈉꌋꆀꋓꅔꊋꃤꄻꈫꈈꉀꐕ。ꅐꑘꃬꏣꑴꌅꋎꍅꉆꌠꑟꐨꉀꐕ，ꀉꇨꃅꅐꑘꅉ꒜ꉈꑴꄺꂡꌠꌋꆀꀉꒉꀊꂾꌠꇮꇐꉁꈾꈢꇓꀖ，ꄺꂡꑘꀋꉬꀋꉆꌠꅐꑘꃬꏣꊇꁧꀊꂥꃅꀻꎆꌠꃅꐨꂂꇙꃅꃄꌬ，ꂴꅑꄺꂡꑘꁥꏓꌠꀻꎆ。ꇮꇐꄺꀱꊐꐕꌠꄹꇙ，ꄺꂡꑘꃷꂷꀑꊋꃅꐙꌠꃅꉹꏮꌠꊥꎆ，ꀑꊋꄺꂡ、ꀊꃴꄺꂡ、ꁧꃤꃅꉹꌠꄺꂡꌠꀻꎆ，ꐳꃅꅐꑘꈁꏦꌋꆀꎆꏂꑘꎀꍹꐛꄟꆴꄻ。ꊇꁧꇮꇐꅉꃀꄐꊋꄻꀉꇨ，ꎕꏦꄐꏁꌠꄻꀉꇨ、ꇩꏹꈴꌠꑟꐨꉀꐕ，ꊋꀥꇱꄉꃷꇐꂓꁦꌠꋈꄻ。ꅐꑘꄐꉻꄻꃪ，ꅐꑘꀋꉬꀋꉆꌠꇩꈐꄉꊱꁨꃅꆹꏮꌠꊥꎆ。

（8）ꏀꄓꅐꑘꌋꆀꃆꏂꊂꑋꅐꑘꉘꉚꀉꇨꇁ。ꊋꇤꄉꏀꄓꈯꌬꅐꑘꄺꑣ。ꅐꑘꏀꀺꋉꃆꃄꌬ，ꋍꉻꃅꏀꀺꉁꈾꋈꄻ、ꇮꇐꎥꃪꀖꁉ、ꅐꇐꊛꆦꊐꐕꌠꄹꎆ，ꐳꃅꊋꀦꀊꏀꌠ、ꌬꇐꀊꏀꌠ、ꃅꈯꐚꈴ、ꃅꈯꀁꂥꎆꏣꑠꄐꇐꃅꐙꌠꏀꄓꅐꑘꁥꏓꀻꎆ。ꅐꑘꒆꉻꄻꉾꃪ，ꇮꇐꀊꏀꌠꅐꇐꀊꏀꌠꌫꅉꐛꐨꀊꏀꌠꄉꈁꀉꒉꃅꌫꄻꌡꀠꃅꐨꃄꌬ，ꐳꃅꏀꄓꅐꑘꄉꈁꐥꃅꀻꎆ。

ꂴꉜꄉꃆꏂꊂꑋꅐꑘꄐꄻ，ꀉꑌꑵꇮꇐꈛꏦ、ꊥꋦꌫꅉꐛꐨ、ꌬꉆꃼꇇꑘꈁꏦ、ꃷꎏꍞꏲꏦꋪꎹꎥ，ꆃꌅꈆꑪꇮꇐ、ꒆꇐꄺꑣ、ꏾꊋꌋꆀꉿꏓꐈꊋ、ꀑꏸꊛꈌ、ꇭꀧꀑꊋ、ꃘꋏꌠꇙꊈꅇꈴꑠꎆꏣꉀꎆꅉꀊꏀꌠꐛꌠꄹꇙ。ꍞꏲꄟꏀꀺ，ꑘꀺꎆꇱꌠꀻꎆ，ꃆꏂꊂꑋꅐꑘꎆꇱꉀꎆꌠꌋꆀꐔꈔꉆꐨꁸꀵꌠꉺꏦꄻꐛ。ꐧꐭꎆꏂꑘꌐꌃꋲꏀꃅꀻꎆꌠꊥꎆ，ꎆꀨꀉꒉꌠꎆꏂꑘꉘꉚ。

（9）ꁧꃤꃅꑘꊇꁧꉾꃪꇿꋌꀊꂥꃅꀻꎆꌠꊥꎆ。ꁧꃤꃅꑘꄐꊋꍔꒉꊇꁧꉀꐕꌠꃅꐨꃄꌬ，ꁧꃤꃅꑘꁉꃑꌠꍔꒉ，ꃹꅼꃅꍞꏲꌠꄺꀱ，ꊋꁈꄏꌠꏱꁈꉻꑫꄻꉾꃪ，ꊈꂄꃅꀰꏢꌠꀨꄜꍔꒉ，ꁁꏯꁸꄉꒃꅐꃅꐙꌠꁧꃤꃅꑘꌐꑘꈴꌠꌋꆀꁌꐨꃬꏣꀊꂥꊐꌠꏭꉜꄉꎇꈻꌠꄹꎆ，ꐥꐨꃅꐙꌠꁧꃤꃅꑘꊇꁧꀊꂥ、ꀉꑌꑵꃅꐙ、ꃅꌒꃅꀻꎆꌠꊥꎆ。ꐛꏀꁧꃤꃅꑘꌋꆀꂴꅑꄺꂡꑘ、ꐛꏀꂿꑘꐮꏓꐊꀻꎆꌠꑟꐨꉀꐕ，ꁧꃤꃅꑘꃷꂷꀑꊋꃅꐙꌠꄹꎆ。ꊋꀥꇱꄉꁧꃤꃅꎕꏦꌋꆀꊇꁧꂓꁦꌠꋈꄻ。ꁧꃤꃅꑘꏓꌗꍞꎖꉻꑫꄻꐛꒆ。

（10）ꐛꏀꈴꅉꃀꉁꈾꉻꑫꏓꄻ。ꊋꀥꇱꄉꅉꃀꉁꈾꋍꃱꃅꄐꎖ，ꄐꉻꐛꉻꄻꃪ，ꏓꐛꐮꏓꐊꌠꊥꎆ，ꋬꂻꍕꎇꐨꌋꆀꀰꏢꐪꊛꉆꐨꉀꐕ。ꄉꄐꃅꈏꅐꄉꅉꃀꉁꈾꀊꏀꉹꌠꋈꄻ，ꈴꌗꅇꈴꈄꏍ、ꇩꏤꑭꊂꋍꉻꃅꌠꌗꏢꊋꃤꈄꏍ、ꈆꑪꇮꇐꀉꒉꀊꂾꌠꅉꃀꉁꈾꑠꋈꄻꌠꌋꆀꏓꋧꇿꋌꀊꂥꃅꌌꌬꌠꄹꎆ，ꋊꃅꐥꌠꅉꃀꉁꈾꏀꆦꌠꌋꆀꃷꂷꀑꊋꃅꐙꌠꄺꀱꌠꄹꎆ。ꐛꏀꈴꏓꇱꈭꈜꎞꎭꉻꑫꄻꉾꃪ，ꊋꀥꇱꄉꃄꁕꐂꄉꏓꇲꄐꄻ、ꃄꄟꐂꄉꋍꉻꃅꐮꊪꊛ，ꊋꁧꃅꄷꉱꑷꌋꆀꇬꑟꌠꏦꀧꌠꄻꀉꇨ。ꀉꑌꑵꃅꐙ、ꍕꎇꐨꀉꇨꌠꇩꏹꎞꎭꈴꈜꉻꑫꄻꐛꒆ。ꊋꀦꈯꌬꈴꈜꄐꄻꌠꄻꃪ，ꊋꀥꇱꄉꀊꏀꉹꌠꊋꀦꅉꃀꉁꈾꋈꄻ。ꐳꃅꐛꏀꈴꒉꈄꏍꋈꄻ，ꒈꅐꒉꑘꉮꌸꄴꏮꄘꑣꌠ、ꒉꅐꀦꏓꇲꁆꄻꌠ、ꇓꈓꇓꉈꒉꇲꁵꌠꏦꀧꄐꊋꄻꀉꇨ。ꇓꈓꇬꑍꃀꑍꌋꆀꃛꊸꄮꑍꑵꐯꇯꌬꌠꄉꉻꅉꃀꉁꈾꋈꄻꌠꄹꎆ。

ꇖ、ꑟꐨꀊꂥꌠꈆꑪꇮꇐꑴꋦꑴꇨꌠꐳꀥꇱ，ꊈꏀꒃꅐꊋꃤꀻꎆꌠꄐꏁ

ꍏꇩꈁꏦꐛꏀꈴꌠꆹꈆꑪꇮꇐꐛꏀꈴꌠꌌꄘꄏꅍꃅꄉꌠꉘꇉꌶꌠꉬ。ꀊꏀꈭꌠꈆꑪꇮꇐꇝꂱꌠꌋꆀꅐꑘꆴꐈꌠꐩꋊꊜꋽꄮꒃꉇꄉ，ꏓꇲꃅꂘꑘꀉꇨꌠꇩꏤ、ꈆꑪꇮꇐꀉꇨꌠꇩꏤ、ꌧꊿꀉꇨꌠꇩꏤꋈꄻ，ꇩꏤꏀꀺꉻꑫꉻꄜꇿꋌꂿꄐꉀꐕ，ꐊꑷꃅꑴꌅꏀꀺꊋꃤꀉꇨꇱ，ꈆꑪꇮꇐꀻꎆꀊꂥꅉꇑꍆꄉ，ꀋꆏꃅꊈꏀꒃꅐꊋꃤꒆꐛꎻ。

（11）ꊋꀥꇱꄉꇬꀦꏀꀺꌋꆀꈯꄜꇮꇐꀋꉬꀋꉆꌠꈢꇓꀖ。ꀊꏀꉹꌠꇩꏤꋋꂷꃅꃅꌠꏦꉻꄻꉾꃪ，ꎃꐚꄩꐂꌠꏁꁈꏁꌬ，ꃬꏣꇬꃅꏓꐛꄆꈜ、ꇮꑘꏸꐕꀋ꒜、ꎖꅍꀉꇨꌠ、ꅉ꒜ꆓꐘ、ꂴꅑꌬꇐ、ꒆꇐꄺꂡꑠꀋꉬꀋꉆꁁꏯꈯꄜꇮꇐꀋꉬꀋꉆꌠꈢꇓꀖꌠꄹꇙꌊꂵꅐꐨꏤꇽꐨꐥꌠꊌꅜ。ꇩꏤꄐꇐꏤꁈꈉꐨꌌꀋꉬꀋꉆꌠꃅꄉ，ꇩꏤꈆꑪꇮꇐꂿꃆꀉꒉꀊꂾꑠꈨꄐꁆꄉꃄꌬ。ꊋꀥꇱꄉꅉꃀꎥꃪꌠꄐꇐꏤꁈꐨ、ꂴꂿꐨ、ꉻꑫꐨꐥꃅꄐꄻ，ꅉꃀꎥꃪꎆꇱꍆꁧꉀꐕ，ꀊꉗꃅꎍꐽꃅꊋꁈꄏꌠꇬꊋꀥꇱ。ꈆꑪꎥꃪ、ꇮꇐꀖꁉꇬꀦꏀꀺꍝꄎꌠꄻꀉꇨꃅꄉ，ꇬꀦꀹꄻꐨꐥ、ꁏꆷꐨꐥꃅꏀꀺꌠꇬꈲꏣꐥꌠꋦꈭꄻꃪ，ꌐꂷꃅꐙꌠꇬꀦꀹꄻꊌꐨꀊꅰꀉꑌꃅꃅꅐꇁ。

（12）ꈆꑪꇮꇐꏀꀺꌠꌋꆀꅐꑘꏀꀺꌠꃹꅼꃅꐮꏓꐊꌠꄹꇙ。ꏓꇲꃅꇩꏤꄐꇐꏤꁈꈆꑪꇮꇐꊋꃤꋈꄻ，ꉻꑫꃅꈢꇓꀖꌠꊋꃤꀉꇨꇱ。ꈆꑪꇮꇐꅉꃀꇎꏦꑴꌅꏦꀧꌠꄻꀉꇨ，ꏓꇲꃅꈆꑪꇮꇐꏀꀺꐽꈉꅉꁍꋈꄻ。ꃄꁕꏀꀺꉻꑫꄻꉾꃪ，ꃄꁕꈆꑪꇮꇐꏀꀺꈯꄜꌋꆀꅐꑘꈆꑪꇮꇐꏀꀺꀊꂥꅉꄐꄻꋈꄻ，ꇩꏹꈆꑪꇮꇐꏀꀺꈯꄜꅐꀿꂿꄐꄻꀉꇨ。ꐳꃅꈆꑪꇮꇐꊌꐨꀉꒉꀊꂾꌠꇿꋌꀊꂥꃅꆹꏮꌫꄻ，ꉪꉻꎕꊪ、ꇢꊭꃅꉛꊬꌠꎕꊪꐽꈉꄐꄻꋈꄻ，ꌫꅉꐛꐨꋈꄻꌠꌋꆀꁉꃑꌠꊋꃤꁦꎆꇱ，ꊋꀥꇱꄉꌧꇐꅏꄻꌅꈌꀧꌋꃅꌋꆀꌫꄻ。ꅉꆺꑭꊂꋓꅔꊋꃤꐥꌠꁉꃑꏀꀺꒆꉻꄺꑣ。ꌠꏀꈆꑪꇮꇐꌧꊿꏀꀺꑘꀺꌠꊋꁈꄏ。ꊋꀥꇱꄉꈆꑪꇮꇐꁊꈴ，ꏀꀺꁱꀕꉘꉚ，ꈆꑪꌧꃀꉌꊈꍔꆙ。ꊋꀥꇱꄉꈆꑪꇮꇐꏦꏲ、ꀺꇗ、ꉌꒊ、ꋬꂻꌠꋈꄻ。

ꎆꏂꑘꈆꑪꇮꇐꏀꀺꀨꄜꉆꈉꄻꀉꇨ，ꏀꀺꅐꀦꎆꏂꑘꏭꉜꄉꏓꋧꌠꄹꇙ，ꎆꏂꑘꊋꁈꄏꄉꂴꅑꄉꏀꀺꏓꐊꄜꊥꇫꄻꐛ、ꇩꏤꈆꑪꇮꇐꈢꇓꀖꂿꃆꀊꅰꀉꑌꃅꆹꄜ，ꎆꏂꑘꊋꊡꌊꅉꃀꎥꃪꌠꇬꎆꇱ，ꏀꀺꃬꏣꅐꑘꃬꏣꎆꀨꃬꏣꌧꊿꃬꏣꃹꅼꃅꐮꏓꐊꌠꊥꎆ。ꈆꑪꇮꇐꂴꅑꌠꎆꏂꑘꉘꉚꀉꇨ，ꇮꇐꀊꏀꀊꂥꌠꎆꏂꑘꌋꆀꈆꑪꇮꇐꉹꌠꐧꐭꎆꏂꑘꀻꎆꌠꊋꁈꄏ，ꎆꏂꑘꎥꃪꀖꁉꌫꎆꌗꇱꈎꄻꍆꁧꉀꐕ。ꍔꃚꑴꌅꏀꀺꅐꇐꃻꄻꌠꇬꊋꃤꀥꇱ。

（13）ꋍꉻꃅꂘꑘꈆꑪꇮꇐꌧꊿꀻꎆꌠꄹꎆ。ꋍꉻꃅꄹꎆꌠꋮꄮꉺꏦꄻꐛꄻꐛꒆ，ꄐꎖꐯꊛ、ꏱꁈꋮꐊ、ꅐꀦꏓꇲ、ꈋꍣꐮꇙꌠꄻꀉꇨ，ꈆꑪꇮꇐꑴꌅꏀꀺꌠꌋꆀꌧꊿꑴꌅꃅꉘꉚꌠꉾꃪꃅꐮꇙꌠꊥꎆ，ꅉꆺꑭꊂꑌꑲꊋꃤꐥꌠꂘꑘꈯꄜ、ꈆꑪꈯꄜ、ꌧꊿꈯꄜꋈꄻ。ꈆꑪꇮꇐꏀꀺ、ꅐꑘꀻꎆꌋꆀꇩꏤꄐꇐꏤꁈꈉꐨꇬꆼꒆꄉꋮꐊꃅꊿꉗꊿꂘ，ꌶꅉꀊꂥꊐꌠꄐꉻꄻꃪ、ꉹꁸꄉꄺꀱꌠꄹꎆ、ꏓꇲꃅꌷꑫꄐꄻ，ꃹꅼꃅ“ꑍꑵꀨꏠ”ꌠꌶꅉꀊꂥꊐꌠꌋꆀꇩꏤꐯꏍꌷꑫꈯꄜꋈꄻꌠꄹꎆ，ꈆꑪꎥꃪꏲꉻ、ꏀꀺꐽꈉ、ꎆꏂꑘ、ꈆꑪꇮꇐꎖꄎꌠꌧꊿꏓꋧꉘꉚꂿꄐꄻꀉꇨ，ꏀꀺꌧꊿꄞꅐꌠꉘꉚ。ꐳꃅꇩꏤꄐꇐꏤꁈꌧꊿꊋꃤꋈꄻ，ꄐꇐꏤꁈꈆꑪꌧ꒜、ꈆꑪꇮꇐꂴꅑꌠꌧꊿ、ꄞꅐꌠꋉꃆꌧꃀ、ꇩꏤꀉꒉꌠꇔꇷ、ꇮꇐꀉꇨꌠꌧꊿꑠꋍꑞꋍꑵꌧꊿꀊꅰꀉꑌꃅꉘꉚꂘꄻꅐꇁ。ꊋꀥꇱꄉꌧꊿꐮꐊꄉꃅ，ꌧꊿꐛꉻꄻꃪ，ꌧꊿꃄꁕꋮꄮꃅꀻꎆꌠꊥꎆ。ꏀꀺꄐꊋ、ꊇꁧ、ꃶꐚꇿꋌ、ꑆꊋꅐꌞꌠꌌꈋꍣꍜꄏꅍꃅꄉ，ꃹꅼꃅꐘꑘꍤꎖ、ꏲꉻꄤꎖ、ꌧꊿꈋꍣ、ꊌꐨꁷꄻꌠꄺꀱ，ꒉꌶꅉ、ꈆꑪꎥꃪꑼꌙ、ꎆꏂꑘꌧꊿꐮꈴꈴꈜꎵꃪꁣꀋꐥꃅꄉ，ꏀꀺꀹꄻꇙꊋꍄꑐꊋꃤꄖꄑ。ꃹꅼꃅꇩꏹꐮꈴꇷꃅ，ꇮꇐꀉꇨꌠꌧꊿꀀꇙꄹꏦꄻꐛ，ꋧꃅꌧꊿꄞꅐꌠꊙꂘ。

（14）ꃹꅼꃅꃷꂷꍏꇩꋈꄻꌠꄹꎆ。ꃷꁨꊫꌐꐊꊈꅉꃀꄹꏦꄻꐛꒆ，ꁉꃑꐯꇯꈲꊌꋬꂻꌠꇩꏤꑭꊂꋍꉻꃅꌠꃷꁨꊫꌐꃷꎏꋈꄻ，ꃹꅼꃅꃷꁨꊫꌐꅐꀦꀖꁉꌫꄻ。ꐥꄜꎆꏣꌋꆀꃷꂷꎆꏣꃹꅼꃅꐮꏓꐊꌠꊥꎆ，ꇮꑘꐯꏑꈄꏍꏀꀺꀻꎆꋉꃆꃄꌬ。ꐳꃅꊿꄻꀑꊋꑠꃷꂷꀑꊋꇮꇐꏀꀺ，ꅉꃀꌧꇗꌋꆀꈯꄜꇮꇐꂵꅐ，ꌗꏢꊋꃤ、ꌗꁈ、ꃷꁨꊫꌐꑠꇿꋌꀊꂥꃅꇲꁵꌠꄻꀉꇨ。ꐊꑷꃅ“ꊿꄻꀑꊋ＋”ꃅꐨꃄꌬ，ꊿꄻꀑꊋꌌꈆꑪꎥꃪꈁꏦꆴꄻꌠꄐꏁ，ꊋꀥꇱꄉꊿꄻꀑꊋꌋꆀꅐꑘꀻꎆ、ꁱꀕꋈꄻ、ꉹꁌꐥꐨꏦꀧ、ꐧꋦꏱꄻꌠꏓꐯꇯꄉꃅ，ꊿꄻꀑꊋꅐꑘꌫꄻꍆꁍꀊꂥꅉꇑꍆꄉ，ꈁꉬꁁꏯꃅꄙꇁꉐꑘꇬꄐꊋꄻꁵ。ꊋꀥꇱꄉꊿꄻꀑꊋꏱꄻ，ꄚꃆꂮꐥꌠꏦꃤꏦꇗ、ꏱꁈꄹꏦ、ꌫꄻꎕꏦ、ꇗꏦꏦꋪꄻꉾꃪ。ꍞꏲꌠꄻꉾꃪ，ꐽꈉꎆꏣꏀꀺꌠꌋꆀꁣꀋꐥꃅꀻꎆꌠꄹꇙ。

ꉬ、ꇩꈐꃷꎏꀉꇨꀉꒉꌠꋈꄻ，ꐳꃅꀻꎆꐛꊂꀊꏀꌠꏓꄻ

ꇩꈐꃷꎏꄻꀉꇨꌠꆹꍏꇩꈁꏦꐛꏀꈴꌠꄐꇐꊫꁱꅉꉬ。ꈒꇓꈉꐨꍔꐯꌠꄐꇐꏤꁈꅉꀨꋋꏢꌭꈬ，ꉹꁌꐥꐨꈲꁵꌠꌋꆀꌬꈧꌠꊥꎆꌠ、ꎊꈬꀂꏽꎆꇱꌠꌋꆀꊿꀂꏽꎆꇱꌠꑖꑟꃅꄻꐯꇯꎼꇁꌠꌭꈬ，ꈉꐨꀊꏀꌠꌌꇲꁵꀊꏀꌠꄐꏁ，ꇲꁵꀊꏀꌠꌌꈉꐨꀊꏀꌠꀹꄻ，ꌬꈧꌋꆀꎆꇱ、ꇲꁵꌋꆀꈉꐨꌠꉾꃪꃅꐮꇙꌠꊥꎆ，ꇩꈐꀉꒉꃅꀰꏮꌠꈒꒆꇙꊋꌋꆀꉘꇉꉆꐨꄻꀉꇨ。

（15）ꊋꀉꒉꃅꇤꄉꌬꈧꌠꄖꄑ。ꃹꅼꃅꌬꈧꄖꄑꌠꌐꐘꃅꐨꃄꌬ。ꃅꅍꊌꌠꊥꎆ、ꊌꐨꁦꎆ、ꂴꄐꄉꌠꎍꐽꎻꌠꏓꇲ，ꋭꋽꃅꄉꉻꁧꃤꃅꌬꐨꏱꎆꌬꐨꇬꍆꐪꉀꐕ，ꀀꊿꌬꈧꊋꃤꄻꀉꇨ。ꊈꂄꌠꌬꈧꅐꇐꌋꆀꁧꃤꃅꇲꁵꌠꍔꒉ。ꈏꃹꉆꌠꄝꃑ、ꃅꑘꐛꄟꐮꏓꐊꌠꌌꀋꉬꀋꉆꌠꃅꄉꁧꃤꃅꌬꈧꌠꍔꒉ，ꀉꇨꃅꅐꇐꂓꁦꌠꄐꏁ、ꎕꏦꊐꐕ、ꇮꇐꀊꏀꌠꌫꄻ，ꃷꇐꌬꈧꊐꅓꐨꍔꐯꊐꐕꌠꄹꇙ，ꈺꇙꐨꀊꐯ、ꄇꇖꐨꀊꂥꌠꌬꈧꌫꅉꐛꐨꀊꏀꈨꄺꑣ。ꇩꏹꌬꈧꈯꄜꇓꈓꉘꉚ，ꋯꈐꃹꄉꌬꈧꌠꍔꐯ。ꈛꎂꃅꌬꈧꊿꇬꑟꌠꈲꈴꏱꁈꊋꃤꀉꒉꃅꇱ，ꍔꃚꎆꀨꌌꉹꁌꐥꐨꏦꀧꌠꇬꌬꌠꌬꐨꁦꎆꇱ。ꌬꈧꊥꎆꌠꄹꏦꉺꏦꄻꉾꃪ，ꐕꍯ、ꀀꑳꑠꌬꈧꌠꏢꑲꐨꀋꎃꀋꊒꌠꏁꁈꋊꎵ，ꌬꈧꃅꑘꐛꄟꀊꏀꌠꈁꏦꀊꏀꌠꌫꅉꐨꀊꏀꌠꇬꄉꄐꌠꏱꄻꏡꁈꄻꐛꄻꐛꒆ，ꃄꎆꁵꄉꃛꇄꌠꐵꄉꑬꆏꌠꃅꇫꑟ。ꀉꇨꃅꌬꈧꊿꌅꈌꈲꁧꀧꌋꃅ。

（16）ꇿꋌꐥꃅꎆꇱꌠꍔꒉ。ꎆꇱꌠꋭꋽꃅꉀꎆꌠꄝꀋꊰ，ꎆꇱꈲꁧꉀꐕ。ꍔꃚꎆꇱꐛꉻꄻꃪ，ꉹꁌꐥꐨꉹꌠꍔꃚꎆꇱꌠꍆꐪꉀꐕ，ꊇꁧꀊꂥꃅꇩꏤꄐꇐꀉꒉꀊꂾꌠꃄꌬꌠꌋꆀꀋꉬꀋꉆꁁꏯꋬꂻꄐꊋꐘꑘꋈꄻꌠꄹꎆ。ꊻꂷꐛꉻꐛꐈꌠꌋꆀꏭꇙꆸꄟꇬꄉꄐ，ꅉꃀꉁꈾꌋꆀꄉꉻꁧꃤꃅꉁꈾꄐꉻꄻꉾꃪ，ꊋꀥꇱꄉꊾꊋꅐꀦꀖꁉꌠꌋꆀꊿꐊꑷꃅꀻꎆꌠꇬꎆꇱ。ꏓꇲꃅꋍꑞꋍꑵꍔꃚꎆꇱꌠꌬꋒ，ꌤꃅꅉꃀꊼꇅꉾꌠꃅꄷꆏꉉꈌꐊꌐꌠꍔꃚꎆꇱꎖꄎꁱꏤꌠꎹꎥ。ꊋꀥꇱꄉꍔꃚꎆꇱꌠꈴꎁꇬꃅꏲꂠ。ꃹꅼꃅꎆꇱꍤꄻꈌꁧꄹꏦꄺꀱ，ꀒꁨꋍꁘꃅꍏꑷꌋꆀꃅꄷꎆꇱꃅꍜꌋꆀꀋꉬꀋꉆꌠꊨꄅ。ꊋꀥꇱꄉꏂꇫꊩꀽ，ꋉꃆꐘꑘꀉꒉꀊꂾꌐꂷꃅꐙꈨꃄꌬ。ꉹꁌꀰꏢꎆꏂ꒧ꐘꑘꀉꒉꀊꂾꌠꇬꋈꄻꈽꌠꎴꈲꉺꏦꄻꉾꃪ，ꍔꃚꎆꇱꎆꀨꄐꏁꈺꇙꂿꄐꋊꇤ，ꉹꁌꈬꇬꎆꇱꍄꑐꊋꃤꄖꄑ、ꉹꁌꈬꇬꎆꇱꍆꐪꉀꐕ，ꃷꎏꀨꇺꌠꇿꋌꐥꃅꎆꇱꌠꉀꎆꇙꊋꄻꀉꇨ。

（17）ꏟꈯꃅꇩꏤꑭꊂꋍꃱꃅꌠꃷꎏꀉꒉꋈꄻꌠꇬꋍꅉꇊꅉꀜꋊꇧꎭ。ꃷꎏꅉꃀꄹꏦꏦꋪꏓꋍꃱꃅ，ꁨꇐꌅꈌꀧꌋꃅ、ꃷꎏꃹꉆ、ꈴꌗꀖꅐ、ꐧꋦꉌꒊ、ꏓꄻꐯꇯꀱ、ꃷꎏꎞꅐꑠꄹꏦꄻꉾꃪ，ꐊꊈꊌꅜ、ꇎꏦꏚꍆ、ꃄꊙꊙꃅ、ꍔꃚꃻꄻꑠꁆꏯꇊꑴꋊꑣꇧꎭ，ꃅꄷꍔꃚꎆꏣꊥꎆꃅꐨꋊꍬ，ꃅꄷꀧꌋꃅꌠꌋꆀꃷꎏꁷꄻꌠꀜꋊꇧꎭ。ꏓꇱꃅ“ꈏꉜꄉ”ꋓꅔꌠꏱꄻ。ꃷꎏꍞꏲꏦꃤꍬꌬꌠꏓꋍꃱꃅ，ꊋꀥꇱꄉꊇꁧꍞꏲ，ꏲꑘꎕꇽꌅꈌꅉꃀꎕꏦꄻꉾꃪ，ꀉꇨꃅꇂꇎꏭꁏꌠꌋꆀꀋꋭꀋꋽꃅꋓꅔꌠꏭꁏꌠꏦꃤꍬꌬꏦꃤꌫꄻ，ꊈꂄꁌꆓ、ꉾꃅꋓꅔꌠꃷꎏꐥꀹꏓꐛ。ꋍꉻꃅꊪꊛꌠꏮꈴꏦꋪꌋꆀꎕꏦꄻꐛꒆ，ꎕꏦꀊꂥꃅꃷꎏꉁꈾꄻꐮꈴ，ꐧꋦꑭꊂꎊꈴꀨꊰꊨꒊ。ꋍꃱꃅꃷꎏꀉꒉꋈꄻꌠꇬꈲꏣꐥꌠꏓꌗ、ꏱꎆꇗꏸ、ꍤꎖꄹꏦꄻꉾꃪ，ꎆꏂꑘꊝꀯꌋꆀꁸꐛꏲꉻ、ꒃꅐꅉꌋꆀꌬꈧꅉꈲꁧꁸꁵꌠꄻꃪ。

ꃘ、ꐳꃅꑟꐨꀊꂥꌠꐧꋦꉪꏦꃷꎏꎆꏣꏦꉻꏓꄻ，ꊇꁧꀊꂥꃅꀻꎆꌠꇙꊋꀉꇨꇱ

ꑟꐨꀊꂥꌠꐧꋦꉪꏦꃷꎏꎆꏣꏦꉻꆹꍏꇩꈁꏦꐛꏀꈴꌠꏦꀧꅍꀋꂿꑘꌠꉬ。ꐧꋦꉪꏦꅉꀨꎆꏣꄹꏦꌭꈬꌋꆀꄻꉾꃪ，ꀊꅰꉾꃪꃅꎆꏣꏦꉻꄺꀱꈻꏁꂿꄐꋊꇤ，ꉻꒉꎆꏣꏱꄻꉻꑫꄻꉾꃪ，ꊇꁧꀊꂥꃅꀻꎆꌠꄔꐽꎴꏷꌠꄉꀧ。

（18）ꋒꐯꋒꃅꋍꑞꋍꉹꀰꏢꀨꄜꍄꑐꊋꃤꄖꄑ。“ꑍꑵꀋꇙꀋꑐ”ꌠꌭꈬꌋꆀꃅꇫꑟ，ꋍꑞꋍꑵꁨꏦꎆꏣꂱꎆꅑꐨꐯꅋꐮꑣ、ꐯꇯꀻꎆꌠꊥꎆ。ꃹꅼꃅꇩꁨꁨꇐꇩꁨꎆꏂꑘꄺꀱ，ꇩꁨꎆꏂꑘꌋꆀꇩꁨꎆꀨꄻꀉꇨꄻꉾꃪꄻꀉꒉ，ꇩꁨꎆꏣꄐꉻꄻꃪꌋꆀꐛꉻꋊꄻꌠꄹꎆ，ꇩꁨꎆꏂꑘꈯꄜꂿꄐꄻꀉꇨ、ꈯꄜꋓꅔꊋꃤꉀꐕ。ꉹꁌꀰꏢꎆꏣꊥꎆꏦꃤꃄꌬꑞꅉꑟ，ꏦꃤꌋꆀꄹꏦꀂꏽꄉꐥꊯꃅꒃꅐꐊꊈꌫꄻ、ꐽꊯꃅꃷꎏꋓꅔꅉꇬꐊꈽ、ꇿꋌꐥꃅꏦꊒꌅꈌꈲꁧꀧꌋꃅꌠꏦꀧ，ꉹꁌꀰꏢꎆꏣꀻꎆꀉꇨꎻ。ꐧꐭꎆꏂꑘꌋꆀꇮꃅꃼꇇꑱꁯꀻꎆꌠꊋꁈꄏ，ꎆꏂꑘꀉꒉꐧꀠꀄꊭꌠꋮꐊꐮꈴꃅꀻꎆꌠꄹꇙ。ꀉꇨꃅꁨꇐꌅꈌꏦꃤꍬꌬꏦꃤꌫꄻꌠꀧꌋꃅ，ꍤꈢ、ꑸꄉ、ꏢꄉꑠꄀꇗꇱꏁꁈꌬꌠꏭꏦꃤꌫꄻꍞꊟꌠꊋꀥꇱ。ꍏꇩꐛꐨꐛꏀꎆꏂꑘꄹꏦꄻꉾꃪ，ꎆꏂꑘꌋꀉꇨꌠꉌꊈꍔꆙ，ꐳꃅꋧꃅꇣꄧꃅꇬꎆꏂꑘꀨꏠꌠꀊꅰꀉꑌꃅꋈꄻ。

（19）ꐳꃅꐊꊈꃷꎏꈴꄉꁆꄻꌠꏦꉻꉺꏦꄻꉾꃪ。ꋍꑞꋍꉹꐊꊈꅐꀦꑘꅐꃅꁆꄻꌠꊥꎆ，ꇓꈓꇓꉈꋍꃱꃅꌠꋈꄻꌬꃅꃷꎏ、ꂿꄐꉾꃪꌠꎆꀨꃷꎏ、ꒈꇁꁣꀋꐥꌠꑘꃅꊋꃤꃷꎏ、ꆹꏮꑘꅐꌠꇮꇐꃷꎏꄻꐛꄻꐛꒆ。ꉻꒉꁨꇐꎝꁭꑴꉻꁱꏤ，ꐊꑷꃅꊭꊎꃷꁨꅐꀦꁨꇐꃶꐚꃷꁨꌥꉩꊨꄅ，ꁨꇐꎝꁭꐛꉻꄻꃪ。ꃼꏓ、ꑱꐢ、ꀠꆦꑠꏱꁈꄻꉾꃪ，ꇿꋌꀁꂥꃅꃄꅉꌬ、ꀈꈥꃅꄻꇫꄉꌠꑳꇤꁨꇐ、ꊭꊎꄉꌠꅉꃀꉁꈾꀰꏢꐛꀕꌬꋒ。ꇮꃅꃼꇇꑘꌬꃅꌫꄻꌅꈌꏤꈉꐪꊛꌠꏦꃤꏦꇗꄻꉾꃪ，ꏦꃤꇬꈴꄉꎍꐽꃅꏤꈉꐪꊛꌤꃅꌠꄹꎆ。ꇩꏤꑭꊂꏲꑘꌤꑘꌤꃅꅉꊭꊎꄉꌠꇩꁨꁨꇐꀰꏢꐛꀕꐯꇯꈲꊌꌠꄹꎆ。ꏦꃤꌫꄻꍞꇽꃄꌬꌠꌋꆀꑱꐢꄹꏦꋭꋽꃅꐯꊛꌠꄹꇙ，ꏦꃤꇬꈴꄉꇿꋌꐥꃅꍤꈢꏢꄉꌠꁨꇐꀰꏢꐛꀕ。

（20）ꉻꒉꎆꏣꏱꄻꇿꋌꉀꐕ。ꇩꏤꀻꎆꄐꎖꄐꇐꍝꄎꂿꄐꄻꀉꇨ，ꏱꎆ、ꎆꃀꏱꁈꋮꐊꌠꊋꀥꇱ，ꅐꑘ、ꁌꏤ、ꃅꅍꊌ、ꌬꈧ、ꎆꇱ、ꃼꇇ、ꃄꁕ、ꋦꈭꀧꌋꃅ、ꍞꏲꑠꏱꁈꂿꄐꋊꇤꋒ，ꈒꇓꈉꐨꁳꀨꇺ、ꌬꈧꌠꁳꈺꇙ、ꈒꒆꌠꉘꇉꄉꉀꎆꌠꎆꏣꀻꎆꈁꏦꀊꅰꀉꑌꃅꏓꐛꌠꊥꎆ。ꀉꇨꃅꌋꈭꏮꌠꌋꆀꈭꏮꐂꌠꋊꄻ，ꀊꅰꃅꏣꀋꑌꌠꉻꒉꏱꁈꃄꌬ，ꐪꊛꄉꉀꎆꌠꄻꎍꐽ、ꃅꅍꊌꌠꄻꎍꐽ、ꂴꄐꄉꌠꄻꎍꐽ。ꉻꒉꏱꁈꌬꍜꋍꃱꃅꐙꌠꄻꀉꇨ，ꀉꇨꃅꏱꁈꃄꌬꇿꋌꈋꍣ，ꂴꄐꄉꌠꏲꂠꌠꉺꏦꄻꐛꒆ，ꊇꁧꀊꂥꃅꀻꎆꌠꏓꇱꃅꊌꐨꍤꎖꌠꄻꃪ。

ꏣꀋꑌꌠꏱꎆꏱꁈꂿꄐꋊꇤ，ꏱꎆꐪꊛꉆꐨꄻꀉꇨ。ꊋꀥꇱꄉꏱꎆꈆꑪꃅꏲꂠ，ꊋꀥꇱꄉꏱꎆꅐꀦꌋꆀꄐꌗꌠꏓꇲ，ꀉꇨꃅꇩꏤꄐꇐꏤꁈꂿꃆꀉꒉꀊꂾꌠꌋꆀꅉꀨꉹꁌꐥꐨꎆꊋꏦꀧ。ꃹꅼꃅꅉꃀꀋꐥꄐꌗꌠꄺꀱ，ꄐꌗꁷꄻꌅꈌꏓꋍꃱꃅ，ꏱꎆꌬꐨꐛꉻꄻꃪ，ꊋꀥꇱꄉꄐꌗꃅꊌꐨꏲꂠ。ꃅꄷꇗꏸ、ꈛꎂꇗꏸꉻꑫꄻꉾꃪ，ꀰꏢꃅꄉꊌꌠ、ꎆꀨꃅꄉꊌꌠ、ꁨꇐꃅꄉꊌꌠꇗꏸꎴꏱꁈꄻꐛꒆ，ꇗꏸꎴꈲꁵꏱꁈꋊꍬ，ꋭꋽꌠꉻꒉꇗꏸꀵꃤꑟꐨꄝꀋꊰ。ꄉꄐꃅꍏꑷꌤꌅꈌꊋꀥꇱ、ꍏꑷꏱꎆꌬꐨꍆꐪꉀꐕ。ꃅꄷꑴꌅꎆꊋꁦꎆꇱ。ꊋꀥꇱꄉꎆꃆꈅꏹꍞꊟ。ꐳꃅꊇꁧꀊꂥꃅꀻꎆꌠꌋꆀꐮꄉꄐꌠꍔꃚꎝꃆꏲꂠꎴꈲꉺꏦꏓꄻ。

ꐳꃅꎆꒉꎆꇁꀉꇨꌠꇩꏤꋈꄻ。ꍏꑷꑴꉴꄹꏦꄻꉾꃪ，ꈆꑪꎍꐽꌠꎆꃀꏱꁈꉻꑫꌋꆀꐊꑷꃅꉱꑷꌠꉻꒉꋓꉪꁨꌠꏲꂠꉻꑫꏓꄻ，ꎆꃀꏱꁈꊪꈴꉺꏦꎵꃪꁣꀋꐥꃅꄉ。ꊋꀉꒉꃅꇤꄉꈆꑪꇮꇐꎆꒉꎆꇁ、ꀊꃴꎆꒉꎆꇁ、ꈲꈴꎆꒉꎆꇁ、ꃀꌠꀨꎹꎆꒉꎆꇁ、ꃷꂷꎆꒉꎆꇁꀻꎆ。ꎆꀨꃷꎏꄹꏦꐯꏆꐨ、ꄉꄐꐨꉀꐕ，ꎆꇱꌠꌋꆀꎆꏓꌠꐯꋮꄮꌠꎆꀨꃷꎏꂿꄐꄻꐛꒆ。ꏣꀋꑌꃅꇴꍆꌅꈌ、ꎝꊫꌐꑠꈛꎂꃅꎆꏓꌠꀻꎆ，ꎍꐽꃅꏤꃷꎊꈬ、ꁥꒆꎊꇐꌋꆀꁨꇐꁌꁦꊫꌐꐛꌠꀻꎆ。ꎆꒉꎆꇁꏲꉻꉻꑫꄻꃪ，ꋍꑞꋍꉹꎆꒉꎆꇁꏲꉻꀨꎍꃅꑘꉌꊢ、ꏱꄻꌠꄻꉾꃪ、ꐯꏍꄉꀻꎆꌠꄹꇙ。ꋬꂻꑘꅐꌠꎆꒉꎆꇁꅉꃀꉁꈾꋈꄻ。ꎍꐽꃅꃷꂷꏓꂱꀙꎆ꒜ꀻꎆ。ꐳꃅꎮꉰꇩꏹꎆꒉꎆꇁꈯꄜꋈꄻ。ꐊꑷꃅꎆꒉꎆꇁꍞꏲꌠꊋꀥꇱ，ꍏꑷꃅꄷꍞꏲꋮꐊꌠꀉꇨꇱ，ꃨꆰꐨꀞꄻꌠꅐꀦꌋꆀꇇꁈꄻꀉꑌ，ꃨꆰꐨꄴꏮꋊꑣꉻꑫꏓꄻ，ꎆꒉꎆꇁꎍꐽꃅꏮꈴꌠꏦꀧ。

ꏃ、ꑟꐨꀊꂥꃅꉇꉻꏭꁉꃑꌠꍔꒉ，ꇷꃅꐯꇯꊋꌠꐛꊂꀊꏀꌠꀹꄻ

ꁉꃑꇷꃅ、ꐯꈲꐯꇯꊋꌠꌭꈬꌠꆹꍏꇩꈁꏦꐛꏀꈴꌠꀋꎪꇖꐨꉬ。ꎍꐽꃅꄹꏦꉹꌠꁉꃑꌠꍔꒉ，ꀉꑌꁁꏯꃼꇇꏦꉻꀧꌋꃅ，ꇩꏹꀰꏮꌠꍔꀺ，ꁉꃑꌠꌌꄺꀱꌠꊥꎆꀻꎆꌠꊥꎆ，ꋧꃅꇩꏤꈁꐥꌠꌋꆀꐯꇯꊜꋽꄮꊌ、ꐯꇯꀻꎆ。

（21）ꏣꀋꑌꃅꑴꌅꃅꁉꃑꌠꍔꒉ。ꇩꏹꎕꏦꀊꂥꌠꎆꏣꃼꇇꏦꋪꇬꊪꊛ，ꁧꃤꃅꑘꌌꀋꉬꀋꉆꌠꃅꄉꃷꎏꃹꉆꌠꌋꆀꁉꃑꁁꏯꍔꒉ，ꋍꁁꏯꁉꃑꌠꈍꈐꌋꆀꃄꁕꍔꒉ。ꐳꃅꃄꁕꌋꆀꑍꁁꏯꃼꇇꎆꇱꋯꏤꆹꎁꄹꎆ，ꎕꏦꀊꂥꌠꄿꐨꃼꇇꃄꅉꈄꏍꍔꒉ。ꃄꁕꁉꃑꄐꉻꄻꃪ，ꐛꄟꀉꑌꑵꃅꐙꌠꁉꃑꀊꂥꅉꄺꑣ。ꄿꐨꃼꇇꃅꉚꅉꉀꐕꄐꇐꏤꁈꃄꌬ，ꎕꏦꀊꂥꃅꉰꇂꄿꐨꃼꇇꈜꀸꋈꄻ。ꏓꇲꃅꈆꑪꇮꇐꏀꀺ、ꁧꃤꃅꃼꇇ、ꅐꑘꀻꎆꑠꁉꃑꇷꃅꐽꈉꀉꒉꀊꂾꌠꋈꄻꄐꄻ。ꏓꂱꀙꎆꃀꇩꏹꇬꄉꌬꌠꄹꎆ，ꎆꀨꐘꑘꁉꃑꑟꐨꉀꐕ，ꑴꌅꋎꍅꉆꌠꏓꂱꀙꎆꃀꋯꐂꁵꄻꉻꑫꋈꄻ。ꅉꆺꑭꊂꎆꏣꎆꒉꎆꇁꏱꄻꄺꀱꌠꄹꎆ，ꀋꈐꀋꉈ、ꁉꃑꐯꏆ、ꇷꃅꋓꊋꌠꇩꏹꎆꏣꐥꀹꏓꄻꌋꆀꀧꌋꃅꌠꄹꇙ。

（22）ꃼꇇꏀꀺꀻꎆꌠꄹꇙ。ꉇꉻꃼꇇꊇꁧꉀꐕꇿꋌꉀꎆꌠꊥꎆ，ꐳꃅꃼꇇꀉꇨꌠꇩꏤꋈꄻ。ꃷꎏꀉꑌꑵꃅꐙꌠꌋꆀꈒꇓꉇꉻꃼꇇꋍꉻꃅꐙꌠꄹꇙ，ꎊꈬꃼꇇꃅꌠꄻꃪꊐꐕ，ꈯꄔꎊꇐꃼꇇ、ꀊꃴꃼꇇꍔꐯ，ꈏꃹꉇꅐꐮꆽꏣꃅꀻꎆꌠꄹꇙ。ꊋꀉꒉꃅꇤꄉꁧꃤꃅꃼꇇꀻꎆ，ꁧꃤꃅꉇꅐꌠꊋꊡ，ꋯꐂꁧꃤꃅꃼꇇꀋꉾꁁꏯꃷꁨꋏꄯꒉꏲꂠꄹꏦꄻꉾꃪ，ꁧꃤꃅꃼꇇꎕꏦꈴꑟꐨꉀꐕ。ꃷꂷꃼꇇꏀꀺꀻꎆ，ꊱꁨꃅꃷꂷꈍꈐꁉꃑꌠꍔꒉ。ꃼꇇꊥꎆꐽꈉꂿꄐꉀꐕ，ꋯꐂꈄꏍꈴꃼꇇꑠꃅꑘꐛꄟꀊꏀꌠꈁꏦꀊꏀꌠꀻꎆꌠꊋꁈꄏ。ꉇꅐꏱꏢꌠꌋꆀꋬꂻꍤꄻꌠꉺꏦꄻꉾꃪ。

（23）ꑍꁁꏯꐮꇬꎆꇱꇷꃅꌠꈥꈉꍔꀺ。ꉇꎆꈻꎷꌠꂱꎆꅑꐨꀊꏀꌠꄺꑣ，“ꃹꉆꇈꀰꏢꉆ”ꌠꃅꑞꅉꑟꋒ，ꉇꎆꈏꃹꉆꌠꀋꉾꁁꏯꃷꁨꋏꄯꒉꊨꒊ，ꉇꎆꋯꈐꄉꉈꑴꎆꇱꌠꊥꎆ。ꉇꉻꃼꇇꎆꇱꁧꃤꃅꌠꏦꀧꉻꑫꄻꐛꒆ，ꐊꑷꃅꇩꏤꉻꊿꊌꐨꃅꑞꅉꑟ，ꃷꁨꊫꌐꑘꅐꃅꌒꋬꂻꃅꋯꐂꏭꇙꌠꄹꎆ，ꂿꉆꎍꐽꂴꄐꄉꉆꌠꄹꏦꋦꈭꄺꑣ。ꇿꋌꐥꃅꉇꉻꏭꎆꇱꌠꏲꂠꌠꃄꌬ，ꎿꉈꏓꇱꁧꃤꃅꉻꑫꄻꐛꒆ，ꃼꇇꃅꎆꇱꋍꉻꃅꐙꌠꊥꎆ，ꅐꑘꃬꏣꇲꁵꃬꏣꄉꄐꃅꊱꁨꃅꋯꐂꄉꄐꄻꌠꄐꏁ。

（24）ꊇꁧꀊꂥꃅꐯꇯ“ꋍꁕꋍꈜ”ꋈꄻ。ꊋꀥꇱꄉꐯꇯꋈꄻꌠꇩꏤꌋꆀꄐꇐꏤꁈꐯꊛ，ꀉꇨꃅꇷꃅꄐꎖꌠꏓꇲꃅꏲꂠ。ꅉꃀꉁꈾ“ꇨꐮꈴ”、ꏦꋪꎕꏦ“ꆓꐮꈴ”、ꐯꇯꋈꄻꌠꇩꏤꏓꂱꌋꆀ“ꉌꂵꐮꈴ”，ꆺꄜꃅꐯꏑꐮꈴꈄꏍꄐꄻꌠꄻꉾꃪ，ꏓꇲꃅꌐꂷꃅꐙꌠꋉꃆꀉꒉꀊꂾꌠꌋꆀ“ꀄꊭꇈꉾꃪ”ꌠꉹꁌꐥꐨꐘꑘꋈꄻꌠꄹꎆ。ꍏꉩ（ꑸ）ꉺꍯꐮꈴꌠꀻꎆꑟꐨꉀꐕ。ꐳꃅꁮꐚꁆꏯꅔꎿꈴꈜꀊꏀꌠꋈꄻ。ꃹꅼꃅꃼꇇ、ꎆꇱ、ꅐꑘ、ꃰꊿꁱꀕꃶꐚꃅꇷꃅ，ꀊꃴꀻꎆ、ꊿꄻꀑꊋ、ꃷꂷꎆꏣ、ꁦꎴꋬꂻ、ꈩꆫ、ꂿꑘꑠꁁꏯꇷꃅꌠꈥꈉꀊꏀꌠꍔꐯ。ꀉꑌꑵꃅꐙ、ꐪꊛꉆ、ꐔꈔꉆꐨꋎꍅꉆꌠꎆꇱꎆꏓꉻꑫꄻꉾꃪ。ꊋꀥꇱꄉꎿꉈꈲꁧꀧꌋꃅ。

ꉆ、ꂿꑘꂿꑘꁡꇤꐛꏀꈴꌠꐳꀥꇱ，ꏟꈯꃅꑣꋂꐊꑷꃅꄖꄑꌄꆣꌠꄹꎆ

ꂿꑘꂿꑘꁡꇤꐛꏀꈴꌠꆹꍏꇩꈁꏦꐛꏀꈴꌠꃅꇴꄉꉻꌋꆀꐛꑊꐥꌠꇬꃆꂮꐥꌠꉬ。“ꌕꂿꑘ”ꌤꃆꂥꀘꋒꌠꌌꄈꑭꊂꌤꃅꌠꀋꂿꑘꐯꀋꂿꑘꌠꃅꄉꌠꌭꈬ，ꇓꈓꇓꉈꐮꏓꐊꄉꀻꎆꌠꊥꎆ，ꐪꊛꄉꎭꇔꈢꇓꀖꌠꊌꐨꄻꈫꈈꍔꀺ，ꂿꑘꁡꇤꀑꐱꃅꀋꃅꋋꄮꐥꐨꇎꏦꐥꌠꄹꇙ，ꐳꃅꂿꑘꀉꇨꌠꇩꏤꋈꄻ。

（25）ꂿꑘꏓꇱꒃꅐꄐꊋꌋꆀꊇꁧꈲꁧꉀꐕ。ꒃꅐꃷꁨꒃꅐꄐꊋ、ꒃꅐꒆꉻ、ꅐꐨꉀꐕꊌꐨꉀꎆꌠꋍꋓꃅꒃꉇꌠꌭꈬ，ꏓꇲꃅꈆꑪꇮꇐꂿꑘ、ꀊꃴꂿꑘ、ꊇꁧꂿꑘ、ꂓꁦꂿꑘꀻꎆ，ꂿꑘꋈꄻꌊꐛꏀꈴꌠꅐꑘꀉꒉꌠꐛ。ꊋꀥꇱꄉꀊꏀꈭꌠꋚꂷꄙꂡꏣꒃꅐꄐꊋꉀꐕꌠꃅꐨꃄꌬ，ꋚꂷꑠꂿꑘꅐꇐꀋꂿꑘꌠꇲꁵꏦꀧꄐꊋꀉꇨꇱ。ꏦꇨꃅꋠꃅꑟꅪꐏꄉ，ꏦꇨꃅꍆꁵꐮꆽꏣꌠꏲꂠ，ꏓꇲꃅꂿꑘꌬꃅꄐꉻꄻꃪ。ꊇꁧꀊꂥꃅꎕꏦꀊꂥꌠꋠꃅꋈꄻꌠꄹꎆ，ꊋꀥꇱꄉꊖꆈꀧꌋꃅꌋꆀꋂꋊꃄꅉꏓꇱꌫꄻ，ꋠꃅꊇꁧꉀꐕ。ꃹꅼꃅꇗꑘꄖꄑꌄꆣꃅꐨꃄꌬ，ꀊꂥꏠꌠꀑꊋ、ꁦꀮꌺꃅꄷꇬꄉꄐꌠꂿꑘꏸꐕꉁꈾꎥꃪꀖꁉꌫꄻꌠꄹꎆ，ꃅꂄꇗꂄꏸꐕꉾꏡꁈꉾꌠꏓꋧꏓꐛꇿꋌꉀꎆꌠꊥꎆ。ꂿꑘꌩꑘꆫꑘꉛꑘꐯꇯꃅꌠꌭꈬ，ꐛꏀꉁꈾꂿꑘꀻꎆ，ꀉꑌꑵꃅꐙꌠꋠꇐꇲꁵꉻꑫꏓꄻ。ꌩꑭꎆꏣꀻꎆ，ꌩꏜꅐꑘꄻꀉꇨ。ꃄꅉꀧꃅꐮꃆꂮꄻꎍꐽ，ꎍꐽꃅꑍꈭꌠꀧꃅꏤꈉꑟꈭꐨꉈꑴꌕꊰꈎꄯꎴꄉꃅꉚꌠꄹꎆ。ꂿꑘꄉꈁꄉꄐꃅꀰꏢꌠꀻꎆ，ꀊꏀꉹꌠꂿꑘꀰꏢꀨꄜꀻꎆꊇꁧꉀꐕ，ꃅꌒꇿꋌꀊꂥꌠꂿꑘꐧꋦꈴꁧꃤꃅꉻꑫꄻꐛꒆ，ꂿꑘꑱꁯꀄꊭꌠꌋꆀꐛꏀꂿꑘꀻꎆꌠꋭꋽꃅꄻꐯꊛꌠꊥꎆ。

（26）ꀀꌒꃅꌒꌠꎔꃨꑣꋂꋈꄻꌠꄹꎆ。“ꋉꃆꄙꃪ”ꎖꋪꌶꄻꌫꄻ，ꑞꃅꋭꌠꑞꃅꃅꑣꋂꋈꄻꃄꌬꉺꏦꄻꉾꃪ，ꉹꁸꊱꁨꃅ、ꃄꁕꃅꑣꋂꄖꄑꌄꆣꌠꄹꎆ，ꋍꁘꋍꁘꃅꂿꑘꁡꇤꅉꃀꉁꈾꐛꒆꐨ、ꄉꉻꁧꃤꃅꃅꌒꐨ、ꊿꀀꋦꈭꀀꌒꐨꉀꐕ。ꏓꇲꃅꋂꍔꄐꉻꄻꃪ，ꑤꏱꁕꅉꃀꉁꈾꋍꉻꃅꄐꎖꋈꄻꏲꂠꌋꃅꌠꄹꇙ。ꋮꐊꃅꑤꏱꁕꇩꏤꃄꅉꈥꈉꏱꄻꌠꄹꎆ，ꎍꐽꃅꋋꁕꇬꃄꅉꃅꏓꇱꏱꄻꌠꃅ，ꐪꊛꄉꂿꑘꁡꇤꊿꀀꋦꈭꏱꄻꉀꐕ，ꎸꇺꋯꉌꊈꌊꂿꑘꁡꇤꅊꁧꒈꅉꄺꀱ、ꋂꈭꋂꇍꑶꌩꀖꑘꌐꀋꉆꑠꌤꃆꂥꀘꋒ，ꐳꃅꂿ꒧ꁡꇤꀋꃅꋋꄮꐥꐨꇎꏦꀋꇎꀋꂪꅉꅋꑣꐯꊯꃅꄉ，ꂿ꒧ꁡꇤꊈꂄꐥꐨꈥꈉꀹꄻ。ꂱꑱꐛꋲꐨꐥꌠꑤꏱꁕꎆꏣꀻꎆ，ꂿꑘꂿꄐꀉꑌꑵꃅꀖꁉ，ꂿꑘꁡꇤꅐꑘꋍꑍꌕꉹꌠꃹꅼꃅꐮꏓꐊꌠꄹꇙ，ꑣꋂꐛꋲꅐꑘꉘꉚꀉꇨ，ꂿꑘꑌꑲꂿꑘꏃꈻꌠꉺꏦꄻꉾꃪ，ꂿꑘꊿꎍꐽꃅꊌꐨꁦꎆꌠꊥꎆ。

（27）ꂿꑘꀉꇨꂿꑘꈲꁵꂿꑘꌣꈚꌠꏱꁈꇿꋌꉀꐕ。ꏱꎆꆏꇬꏭꌌꂴꄉꏦꀧ、ꎆꒉꎆꇁꆏꀋꉬꀋꉆꃅꇬꏭꉜꄉꎎ、ꐧꋦꆏꏣꀋꑌꃅꇫꃅꈽꌠꀉꑌꑵꃅꎆꇱꌠꐛꊂꄻꐛꒆ，ꑣꋂꄖꄑꌄꆣꌠꇬꎆꇱꌠꊋꃤꀋꆏꃅꀉꇨꇱꌠꄉꀧ。ꂿꑘꊿꑘꃅꊖꑣꋙꊪꒉꏽꌠꏣꀋꑌꐨꀧꌋꃅꌋꆀꄖꄑ，ꁌꏤ、ꁥꁵ、ꄜꏂꀧꑠꏱꁈꊋꁈꄏꌋꆀꋮꐊꌠꄻꀉꇨ。ꋚꂷꀨꅐꃅꄷꈲꁧꁥꁵꌠꊋꃤꀉꇨꇱ，ꅏꅉꃷꅉꌜꇢꊭꇬꅶꍯꈲꁧꁵꊒꌠꃄꌬ。ꋚꂷꃻꄻꃷꄻꌠꌋꆀꊭꊎꏲꂠꌠꊋꀥꇱ。ꂿꑘꅐꇐꈏꃹꌠꀉꑌꑵꃅꐙꌠꄹꎆ，ꃼꇇꌋꆀꒃꅐꐯꋮꄮꌠꊥꎆ。ꇓꈓꇓꉈꐊꊈꐮꏯꉜꄉꏭꇙꌠꄹꇙ，ꋍꑞꋍꉹꌧꊿꊋꊡꌊꂿꑘꁡꇤꄉꁧꃤꃅꆹꌋꆀꑘꀺꃅꅍꊌꆹ。ꏎꏸꏓꋧꃅꂿꑘꁡꇤꋍꉻꀰꏢꐨꐥꌠꋈꄻꌬꃅꌫꄻ，ꏦꃤꇬꈴꄉꀈꈥꃅꇫꄉꌠꃄꅉꌋꆀꑳꇤꀰꏢꐛꀕꌬꋒꄻꋒ，ꉹꁸꄉꑣꋂꀻꎆꌬꃅꏦꀧ。ꀊꏀꉹꌠꂿꑘꁡꇤꋍꉻꎆꏣꀻꎆꌠꊋꁈꄏ。

ꏓꇲꃅꀱꌢꎭꇁꌢꎭꌠꐛꌠꅉꀕꃅꄴꏮꌠꉺꏦꄻꐛ，ꊒꌸꃅꇇꀨꄏꐓꌠꌭꈬ，ꂫꑟꀧꄉꏦꀧꌠꄻꉾꃪ，ꀖꁉꃅꇇꀨꄏꐓꌠꄻꀉꇨ，ꈒꒆꇙꊋꄻꀉꇨꇁ，ꊐꁸꉹꁸꄉꐞꀋꄿꃅꄷꇇꀨꄏꐓ，ꑣꋂꄖꄑꌄꆣꇬꀨꄉꇇꀨꄏꐓꌠꑤꇬꊋꁈꄏꌠꏱꁈꄻꐛꒆ，ꄉꈁꐨꐥꃅꀱꌢꎭꇁꌢꎭꌠꐛꌠꇫꅐꀋꇁꌠꄉꀧ。

ꈬ、ꃄꁕꎆꏣꄐꉻꄻꃪ，ꃄꁕꋮꄮꃅꀻꎆꌠꊥꎆ

ꃄꁕꋮꄮꃅꀻꎆꌠꆹꍏꇩꈁꏦꐛꏀꈴꌠꈒꇓꇖꐨꉬ。ꃄꁕꋮꄮꃅꀻꎆꌠꄐꇐꏤꁈ、ꃄꁕꀉꒉꀊꂾꌠꄐꇐꏤꁈ、ꀨꄜꂿꄐꃄꁕꄐꇐꏤꁈ、ꀊꏀꉹꌠꇓꈓꏦꎫꐛꈴꌠꄐꇐꏤꁈꐮꄅꎼꇁꌠꇿꋌꋊꇤ，ꀉꒉꀊꂾꌠꒃꅐꊋꃤꄐꉻꄻꃪ，ꃄꁕꀋꉬꀋꉆꌠꉀꎆꊧꂿꄐꋊꇤꅐꇁ，ꂱꎆꅑꐨꐯꅋꐮꑣ、ꊇꁧꀊꂥꃅꀻꎆꌠꃄꁕꎆꏣꄐꉻꌋꆀꇩꏤꃄꅉꈥꈉꉻꑫꏓꄻ。

（28）ꃄꁕꀻꎆꌠꋮꄮꐨꄻꀉꇨ。ꏟꈯꃅꁮꐚꁁꏯꀉꒉꃅꀖꁉꌠꐛꊂꀊꏀꌠꏓꐛ、ꑛꌋꈤꐊꑷꃅꄖꄑꌄꆣꌠꂵꅐꐨꀊꏀꌠꊌꅜ、ꈯꄔꃅꄷꐳꃅꉀꄓ、ꁭꅐꃅꄷꐳꃅꐛꏀꈴꌠꄹꎆꌠꄹꇙ，ꁭꅐꈯꄔꁮꐚ、ꒈꂪꒈꀑꁁꏯꋮꄮꃅꀻꎆꌠꊥꎆ。ꏢꏸꏹ、ꍤꏦꌕꎏ、ꒀꇤꀎꄊꊅꐎꊇꁧꀊꂥꃅꀻꎆꌠꇙꊋꇁꀦꂿꄐꄻꈫꈈꉀꐕ。ꐪꊛꄉꍤꏦꎆꏣꐛꁕꀻꎆꌠ、ꉸꉼꒊꃀꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆꌠꄹꎆ。ꎕꏦꀊꂥꊇꁧꀊꂥꃅꑪꉢꑟꐎꐛꏀꈴꇓꈓꋈꄻꌠꄹꎆ，ꍰꒄꃅꄷꑍꇓꈓꎆꏣꈭꀻꎆꄐꊋꏠꊐꉀꐕ。ꃅꄷꈁꐥꌠꊋꊡꌊꊼꇅꂱꎆꅑꐨꋊꇤꎼꇁ、ꂱꑱꄐꐨꍔꀦꎼꇁ，ꎆꏣꀉꇨꌠꌜꃣꁧꀉꒉꌠꆹꄜꌠꊋꁈꄏ，ꍏꇩꈁꏦꐛꏀꈴꌠꄹꎆꌠꇬꄉꂴꅑꌶꀠꃅ。ꐯꀋꌡꐨꐥꃅꏱꁈꊋꁈꄏꌠꇬꊋꀉꒉꃅꇱ，ꇝꂱꀉꆹꃅꄷ、ꊿꋅꃅꄷ、ꃅꋮꃅꄷꑠꄖꄑꌄꆣꀻꎆꌠꊥꎆ。

（29）ꃄꁕꏓꇙꃅꀻꎆꌠꊥꎆ。ꃄꁕꐂꈳꁕꐂꌠꈴꈜꀉꒉꌠꋈꄻꌠꄹꎆ，ꃄꁕꅉꃀꉁꈾꐯꏑꐮꈴꌠꄻꀉꇨ。ꇓꈓꋇꀋꉬꀋꉆꌠꋮꄮꏓꇙꃅꀻꎆꌠꊋꀥꇱ，ꃄꁕꏀꀺꃬꏣꅐꑘꃬꏣꇿꋌꀊꂥꃅꇷꃅꌠꊥꎆ。ꍤꏦꒊꃀꐧꐕꌠꇓꈓꋇꐳꃅꀻꎆꌠꄹꇙ，ꃄꁕꃅꐙꌠꈯꄜꇓꈓꈍꑋꂷꉘꉚꀻꎆ，ꀊꅰꉾꃪꃅꃄꁕꐂꐯꊛꉹꌠꃅꄷꄘꄏꈺꇙꂿꄐꋊꇤ。ꏲꑘꃄꁕꐂꄉꇷꃅꌠꃹꅼꃅꃅ，ꃄꁕꇢꊭꄐꎖꏓꇲ、ꅐꑘꇷꃅ、ꈲꏣꐯꇯꊌꑠꉺꏦꄻꐛꒆ，ꈳꁕꎆꏣꑠꈁꏦꍔꐯ。

（30）ꇩꏤꃄꅉꈥꈉꀻꎆꐛꊂꄻꃪ。ꀉꇨꃅꀨꄜꂿꄐꃄꁕꄐꇐꏤꁈꃄꌬ，ꇓꈓꐛꈴꃄꁕ、ꂿꑘꅐꇐꀨꅐꃄꁕ、ꀋꉬꀋꉆꌠꒆꉻꂿꄐꃄꁕꐛꊂꉻꄜꎍꐽꌠꄝꀋꊰ，ꐋꀋꌡꂿꄐꃄꁕꑭꋧꃅꁸꊨꄅꃅꄉ，ꏱꁈꊋꁈꄏꌠꌋꆀꍤꎖꈋꍣꉺꏦꄻꉾꃪ。ꄐꇐꏤꁈꃅꐙꌠꅐꑘ、ꊋꀦꅐꀦꅉꁍꑠꄐꉻꄻꃪꌠꄹꇙ。ꇩꏤꃄꅉꈥꈉꄐꎖꉻꑫꄻꉾꃪ，ꋠꃅꌋꆀꐥꍂꅉꀨꂿꑘꋠꃅ、ꒆꉻꀧꌋꃅꑟꅪ、ꇓꈓꏦꎫꀖꁉꄹꌐꑠꋏꌫꑟꄻꃪꌠꃅꑞꅉꑟ，ꃄꁕꁸꉹꑫꁸꄉꍣꐨꐥꃅ、ꑭꋧꃅꌬꍩꏱꏢꌠꃄꌬ。ꌜꊐꌠꍔꃚꋈꄻꌬꃅꏓꇲꌠꑴꌅꌅꈌꀊꅰꀉꒉꃅꄻꇬꁳ，ꋈꄻꌬꃅꈁꉬꃷꁨꄐꎖꊬꌠꇬꈴꄉꏱꋏꌠꈁꏦꎹꎥꄉꃄꌬ，ꊭꊐꃷꁨꌋꆀꉀꎆꃷꁨꏓꇲꄉꏓꇱꃅꃄꅉꇲꁵꌠꃄꌬ。

（31）ꃹꅼꃅꊿꌌꀨꇬꄉꌠꀊꏀꉹꌠꇓꈓꏦꎫꐛꈴꌠꄹꎆ。ꈆꑪꃅꊱꁨꃅꂿꑘꊻꂷꆹꏮꌊꇓꈓꀀꊿꐛꌠꄹꎆ，ꅉꀕꃅꇬꀀꅉꁳꑱꁯꊿꇬꁱꄀꄉꅉꀨꄉꉻꁧꃤꃅꇲꁵꌠꄹꏦꄹꌬ。ꀉꒉꐯꀉꒉꀋꇰꀋꉈꃅꀉꒉꌠꇓꈓꏱꄻꐛꏀꈴꌠꄹꎆ，ꐳꃅꇓꈓꋇꋍꉻꃅꐙꎻꌋꆀꇓꈓꈭꇓꈓꋍꂷꃅꐙꎻ，ꇓꈓꄉꈁꐛꉻꄻꃪ，ꇓꈓꀉꒉꐧꀠꀄꊭꌠꌋꆀꇓꈓꏦꎫꀄꊭꌠꋮꄮꃅꀻꎆ、ꏓꋧꏓꌤꃅꄐꄻꌠꊥꎆ。ꉹꁸꄉꑤꇓꈓꌌꀋꂿꑘꌠꊐꄜꃅꄉꌠꇓꈓꏦꎫꐛꈴꌠꋈꄻꌠꄹꎆ，ꅐꑘꄘꄏꄐꊋꌋꆀꄉꉻꁧꃤꃅꑟꐨꉀꐕ。ꇓꈓꈐꐛꊈꃅꀻꎆꌠꌭꈬ，ꊋꀉꒉꃅꇤꄉꇓꈓꏀꆦꌠꃄꌬ，ꏀꀺ、ꀀꌒ、ꎔꃨ、ꍕꎇꐨꐥ、ꌧꑳ、ꀑꁮꌠꐛꏀꈴꌠꏓꂱꇓꈓꋈꄻ。ꏟꈯꃅꃅꋮꇓꈓꏦꎫꋈꄻꌠꄹꎆ。

（32）ꊋꀥꇱꄉꎿꃀꀖꁉꌫꄻꀧꌋꃅ。ꅔꎿꏓꇲꌠꌭꈬ，ꄐꇐꏤꁈꐨꐥꃅꎿꃀꏲꂠꌠꄐꊋꉀꐕ，ꎿꃀꎆꏣꊇꁧꀊꂥꃅꀻꎆꌠꄹꇙ，ꐳꃅꎿꃀꀉꇨꌠꇩꏤꋈꄻ。ꎿꃀꈆꑪꇮꇐꏀꀺꌠꊋꀥꇱ，ꎿꃀꉁꈾꄺꂡꑘꂱꎆꅑꐨꄻꈫꈈꉀꐕ，ꎿꃀꏀꄓꅐꑘꄻꀉꇨ，ꀋꃅꋋꄮꎿꈴꎞꎭꁧꃤꃅꑘꀻꎆ。ꎿꃀꍤꄻꌋꆀꉜꎖꍞꎖꌠꃄꌬ，ꎿꃀꊋꀦꅐꀦꌋꆀꎾꁕꎿꅔꀖꁉꌫꄻꌠꄹꎆ，ꊋꀥꇱꄉꀋꉬꀋꉆꌠꎿꁕꒆꉻꋦꈭꀧꌋꃅꄻꐛꅉꐛ。ꎿꃴꀊꅼꅉꍤꎖꄘꄏꏦꀧꉻꑫꄻꀉꇨ。ꏟꈯꃅꎿꃀꌅꈌꈲꁧꌋꆀꋬꂻꐨꀧꌋꃅ，ꎿꇬꏦꃤꍬꌬꌠꌋꆀꎿꌤꏦꃤꌫꄻꌠꄐꊋꉀꐕ。

ꊰ、ꊿꋅꑭꊂꁱꀕꏀꀺꀹꄻꍄꑐꊋꃤꄖꄑ，ꐧꋦꉪꏦꁱꀕꄻꌄꆣꀻꎆ

ꁱꀕꌄꆣꍄꑐꌠꆹꍏꇩꈁꏦꐛꏀꈴꌠꌐꂷꀋꉬꀋꉆꌠꉬ。ꂷꇻꌦꉪꏦꉪꐨꐛꉻꁁꏯꇬꄐꇺꉆꈉꌭꈬ，ꐴꅿꄖꅼꀉꇨꌠꍏꉸꌧꑳꇬꋦ，ꈴꌗꇮꇐꀻꎆꒈꂃꇬꐊ，ꉪꇐꄐꏁꊋꃤ、ꉌꊈꏓꋧꊋꃤ、ꁌꐨꇳꍝꊋꃤ、ꇩꏹꑌꑲꊋꃤꀉꇨꃅꐥꌠꃅꋊꀊꏀꋎꌠꍏꇩꐛꐨꐧꋦꉪꏦꁱꀕꀻꎆ，ꏟꈯꃅꁱꀕꀉꇨꌠꇩꏤꋈꄻꌠꄹꎆ。

（33）ꐧꋦꉪꏦꈯꄜꁌꐨꉜꐨꍔꆙꌋꆀꃄꄻ。ꃹꅼꃅꄈꅿꏀꀺꌧꇗꌶꄻꌋꆀꄜꉺꉙꂘꌠꃅ，ꀋꄝꀋꏯꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꉌꏓꊈꄻ。ꂷꇻꌦꉪꏦꌧꇗꎥꃪꌠꌋꆀꋈꄻꌠꋉꃆꏀꀺꃄꌬ，ꐳꃅꍏꇩꍔꑪꐧꋦꈆꑪꑴꌅꌧꇐꉻꑫꏓꄻ。ꐧꋦꉪꏦꈯꄜꁌꐨꉜꐨꌌꁱꀕꋈꄻꌠꄐꏁ，ꁱꀕꉌꊋꉘꉚ、ꑌꇐꉗꄻꌠꂿꄐꋊꇤꅐꇁ，ꊿꋅꈁꐥꌠꃅꊋꑌꏡꑌꌠꉌꊈꐛꊈꃹꉘ。ꀋꎪꁱꀕ、ꐙꎴꁱꀕꍔꆙ。ꉪꇐꍔꍞꌤꃅꌠꊋꀥꇱꌋꆀꄻꃪ，ꌶꅉꁱꀕꋈꄻꌠꄹꎆ，ꇝꂱꅐꀦꌬꋒ，ꊋꀥꇱꄉꀊꉘꌠꏀꉪꅉꑇꐨ꒿ꂘ。ꏓꇲꃅꇓꈓꇓꉈꉌꊈꌧꑳꋈꄻꌠꄹꎆ，ꏓꂱꌧꑳꊇꁧꌋꆀꐧꋦꌧꑳꑟꐨꉀꐕ。ꊋꀥꇱꄉꈄꏍꐊꇐꋈꄻꌋꆀꏲꂠ。ꈴꌗꈴꌠꇎꏦꇂꃴꁱꀕꁁꏯꏱꄻꌠꄐꊋꉀꐕ。

（34）ꊋꀉꒉꃅꇤꄉꁱꀕꌤꑘꃅꌊꌄꆣ。ꁱꀕꒆꉻꉾꃪꌠꄺꑣ，ꁱꀕꇬꀦꀹꄻꄐꊋꉀꐕ，ꈨꏀꅏꄻ、ꅇꁊꄆꒌꄆꁱ、ꁱꇐꋽꇐꑠꁁꏯꅧꌃꅐꇐꁰꄻꌠꄹꇙ。ꄉꈁꉻꒉ、ꐛꉻꋭꋽ、ꋦꄉꏀꀺꌠꁱꀕꌧꊿꀉꇨꁥꏓꐛꌠꉘꉚ。ꀊꐯꈭꃅꉹꁌꃅꐙꌠꁱꀕꃅꈧꌠꃅ，ꐯꏑꈄꏍꇎꏦꇂꃴꉹꁌꋍꏅꁱꀕꋽꇐꀊꏀꌠꃄꄻꌄꆣ。ꃹꅼꃅꈯꀨꇢꈴꄜꉻꑫꃅꆴꐈꌠꃅ，ꈨꏀꄜꉺꌠꌋꆀꈄꏍꈋꍣꌠꋍꉻꃅꏲꂠꌠꄹꎆ，ꈯꀨꈋꍣꄐꏁꄐꊋꉀꐕ。ꃹꅼꃅꍏꉸꋊꃅꐥꌠꁱꀕꉾꃪꌠꊪꊛꀻꎆꋉꃆꃄꌬ，ꁱꀕꍸꇐꉻꑫꃅꀧꌋꃅꌠꌋꆀꋍꃱꃅꍞꏲꍞꌋꌠꄹꇙ，ꊋꀥꇱꄉꐩꋊꁱꀕꂓꅑꇓꈓ、ꏦꎫꐛꅉ、ꋂꍔꇿꋌꐥꃅꀧꌋꃅꌋꆀꀉꇙꀕꃅꊪꊛ。ꇩꏤꁱꀕꋍꏅꈩꅉꋉꋒꌬꋒ。ꍏꉸꌧꑳꌐꉻꉻꑫꏓꄻ。ꁱꀕꉹꁌꈲꌠꌭꈬ，ꄉꉻꁱꀕꁧꃤꃅꌠꊇꁧꉀꐕꇿꋌꉀꎆꌠꃅꐨꃄꌬ。ꄯꒉꉜꀘꐧꋦꋈꄻꌠꄹꎆ。ꏓꇲꃅꉹꁌꈯꎟꌠꌋꆀꋓꈿꈯꎟꌠꀻꎆꌠꄹꎆ，ꐳꃅꈯꎟꀉꇨꌠꇩꏤꋈꄻ。

（35）ꐳꃅꁱꀕꅐꑘꀻꎆ。ꁱꀕꏲꂠꏦꉻꌋꆀꒃꅐꀰꏢꉺꏦꄻꉾꃪ。ꁱꀕꅐꑘꉻꑫꌋꆀꃷꎏꉻꑫꄻꐛꒆ，ꉾꃪꌠꁱꀕꎆꏂꑘꌋꆀꂓꁦꌠꉘꉚ，ꀉꒉꀊꂾꌠꁱꀕꅐꑘꐘꑘꈺꇙꄐꇐꏤꁈꃄꌬ，ꏣꀋꑌꌠꁱꀕꎆꏣꏱꁈꃄꌬ。ꁱꀕꌋꆀꈆꑪꇮꇐꐮꏓꐊꌠꄹꎆ，ꁱꀕꋈꄻꌠꃷꂷꀑꊋꃅꐙꌠꃅꄐꊋꁵ、ꈴꌗꈴꃅꉹꏮꌠꄹꇙ，ꀊꏀꉹꌠꁱꀕꃅꑘꐛꄟꀻꎆ。ꈄꏍꁱꇐ、ꈄꏍꈩꇐ、ꈄꏍꉜꅲꑠꉾꃪꃅꀻꎆꌠꋊꍬꄐꏁ，ꊋꀥꇱꄉꒆꆹꀋꑟꊿꈄꏍꀧꌋꃅ。ꈩꆫꀉꇨꌠꇩꏤꋈꄻꌠꄹꎆ，ꊇꁧꀊꂥꌠꈩꆫꅐꇐꇲꁵꌠꀉꑌꇁꎻ，ꈩꆫꁧꃤꃅꊇꁧꉀꐕ。ꋯꈐꈩꆫꇁꌠꈝꐮꈴꇩꏹꈴꐨꉀꐕ。ꁱꀕꈩꆫꃹꅼꃅꐮꏓꐊꌠꄹꎆ，ꊋꀉꒉꃅꇤꄉꁱꀕꈩꆫꑘꀻꎆ，ꁱꀕꌌꎆꏣꐧꋦꀻꎆꌠꇬꊋꇱ。

（36）ꍏꉸꌧꑳꄜꁊꊋꃤꑌꑲꊋꃤꉀꐕ。ꇩꏹꄜꁊꏦꉻꉺꏦꄻꉾꃪ，ꄜꁊꊐꄜꌋꆀꃄꄟꏀꀺ，ꊋꀥꇱꄉꀋꉬꀋꉆꌠꅉꁍꋈꄻ，ꈯꀨꇢꈴꄜꇩꏹꄜꁊꄐꊋꀉꇨꇱ，ꐊꑷꃅꇩꏹꅇꉉꌅꈌꉀꐕ，ꍏꇩꁮꅉꉉꋒ，ꊿꋌꑅ、ꊿꋋꉂ、ꊿꋋꁌꒉꌠꍏꇩꉻꑊꍔꀦ。ꊋꀥꇱꄉꃄꁕꇩꏤꎥꃪ，ꇩꏹꄜꁊꇿꋌꄐꊋꉀꐕ。ꌧꑳꐮꈴꐮꌷꌠꄻꃹꅼ，ꀊꐯꈭꃅꇩꏹꃰꊿꁱꀕꐮꈴꇷꃅꌠꃅ，ꁱꀕꎆꏂꑘꌋꆀꁱꀕꅐꇐꉾꃪꌠꀊꅰꀉꑌꃅꋧꃅꉜꄉꆹꌠꊋꊡ。

ꊯꊪ、ꉹꁌꐥꐨꏦꀧꌋꆀꄻꃪꌠꇬꊋꃤꀉꒉꃅꇱ，ꏟꈯꃅꏓꂱꈁꐥꌠꃅꐯꇯꌣꈚꌠꄹꎆ

ꏓꂱꐥꌒꄻꌒꏾꌠꃅꇫꑟꌠꆹꍏꇩꈁꏦꐛꏀꈴꌠꄓꈌꌋꆀꑞꈌꉬ。ꊋꈀꑌꃅꇤꄉꃅ、ꊋꎖꄉꃤꀳꌠꌭꈬ，ꊋꀥꇱꄉꈲꈴꃅꐙꌠ、ꅉꃀꃅꐙꌠ、ꂫꑟꀧꃅꐙꌠꉹꁌꐥꐨꋈꄻ，ꏓꂱꉹꁌꃛꊸꊋꋠꐒꊀꉘꇉꌠꌤꃆꂥꀘꋒ，ꐧꋦꏭꇙꈴꈜꄻꁣꀋꐥꃅꄉ，ꏓꂱꐥꐨꊇꁧꉀꐕ。

（37）ꊇꁧꀊꂥꃅꋒꐯꋒꃅꃅꅍꊌꌠꊥꎆ。ꃹꅼꃅꃅꅍꊌꌠꄻꂴꄉꌠꄐꇐꏤꁈꃄꌬ，ꃅꅍꊌꊥꎆꉺꏦꄻꐛꒆ，ꃅꅍꊌꐮꄮꉹꌠꀻꎆꄟꏓꄻ。ꅐꑘꌋꆀꃅꅍꊌꌠꋮꐊꌠꊋꀥꇱ，ꏣꀋꑌꃅꃅꑘꀊꏀꃅꈉꀊꏀꌠꉘꉚ，ꎆꏂꑘꃅꈉꎍꐽꃅꈉꍔꐯꌠꊋꁈꄏ。ꊾꊋꅐꀦꇲꈉꐨꐮꄉꄐꌠꉺꏦꄻꐛꒆ，ꐥꍂꃅꃅꑘꇮꇐꄐꊋꁱꂘꄹꏦꄻꐛꒆ，ꀉꇨꃅꃅꑘꌋꌠꌋꆀꊾꌬꌠꉪꉻꄐꏁ，ꊋꇤꄉꐛꉻꐨꐥꌠꃅꅍꊌꐮꄙꐨꂥꀘ。ꃅꅍꊌꊋꁈꄏꌠꌋꆀꄉꉻꁧꃤꃅꌠꉻꑫꄻꐛꒆ，ꌶꅉꀊꂥꊐꌠꌶꅐꌠꌶꌺ、ꂿꑘꊿꊋꃅꌠ、ꎞꆏꂽꑼꑠꀋꉬꀋꉆꌠꊿꁥꌠꃅꅍꊌꌠꎍꐽꌋꆀꍔꒉ，ꋭꋽꃅꃅꅍꊌꌠ、ꃅꅍꊌꐛꄟꀊꏀꌠꉾꃪꃅꀻꎆꌠꄹꇙ。ꑘꀺꊋꁈꄏꌠꊋꀉꒉꃅꇱ，ꑘꀺꌠꌌꃅꅍꊌꌠꈺꇙꌠꊌꐨꄻꀉꇨ。ꑘꃅꎕꏦꉻꑫꌋꆀꑘꃅꐮꃆꂮꋮꒉꋮꄮꉺꏦꄻꉾꃪ，ꊋꀥꇱꄉꑘꃅꊿꌅꈌꈲꁧꏦꀧ，ꐽꊯꊱꁨꌠꃅꅍꊌꌠꋦꈭꄺꑣ。ꃅꅍꊌꁧꏖꐨꄤꎖꌋꆀꍞꎖꌗꋏꌠꄻꉾꃪ，ꏓꇱꃅꉇꉻꋦꈭꐛꐈꌠꌋꆀꇮꇐꀊꏀꌠꀻꎆꌠꃅꅍꊌꌠꏭꁧꏖꌠꊜꄻ。

（38）ꊌꐨꁷꄻꄹꏦꄻꉾꃪ。ꃅꐨꉜꄉꁷꄻꌠꌌꀨꄜꃅꄉ、ꁷꄻꄟꀉꑌꑵꃅꐯꇯꐥꌠꌭꈬ，ꀀꊿꊌꐨꇩꂱꊌꐨꁷꄻꅉꇬꍆꐪꉀꐕ，ꑘꃅꃄꎆꇬꉘꃀꃢꌠꁷꄻꅉꇬꍆꐪꉀꐕ。ꋍꑞꋍꑵꐊꊈꆏꃷꎏꁳꅐꌞꐨꈋꍣ、ꅐꌞꐨꇬꈴꄉꃄꁌꏤꄻꌠꉘꃀꃢꌠꁷꄻꉺꏦꄻꐛꒆ，ꀉꑌꃅꌠꀉꑌꃅꊌ、ꇮꇐꀉꇨꌠꀉꑌꃅꊌ、ꏀꀺꌠꀉꑌꃅꊌꌠꊥꎆ。ꑘꃅꊿꃄꎆꏤꄻ、ꋭꋽꃅꉀꎆ、ꁵꄻꏦꀧꌠꉺꏦꄻꉾꃪ，ꃄꎆꋍꏅꃅꋮꒉꌠꄹꏦꄹꌬ，ꃄꎆꎕꏦꀁꂥꐯꀁꂥꌠꋊꄻꉺꏦꄻꐛꒆ，ꎆꏂꑘꃄꎆꁷꄻꉻꒉꄐꇺꌠꊋꀥꇱ。ꈝꃀꀉꑌꃅꏂꄉꇓꈓꇓꉈꀀꊿꁨꇐꃅꐙꌠꊌꐨꉀꎆꎻ。ꇗꏸꎴ、ꐧꋦꏦꀧ、ꆹꏮꁵꄻꑠꉈꑴꁷꄻꋊꄻꌠꊋꀥꇱ。ꉻꈲꉌꂄꌤꑘꀻꎆꌠꊥꎆꌋꆀꋊꍬ。ꊌꐨꁷꄻꐥꀹꌋꆀꁨꇐꏓꊭꉺꏦꋊꍬ，ꑘꋦꏀꀺꏦꊒꌣꈚꇁꌠꊋꁈꄏ，ꂴꌣꈚꌠꁳꊁꃤꈻꏁꌊꌣꈚꇁꄉꐯꇯꌣꈚꌠꊥꎆꌠꊋꊡ。ꇓꈓꇓꉈꀀꊿꊌꐨꉀꎆꎖꄎꌠꃄꌬ，ꇿꋌꐥꃅꊌꐨꀁꂥꌠꊿꁥꌠꊌꐨꉀꎆꎻ，ꎍꐽꃅꊌꐨꐧꀠꃅꐙꌠꊿꁥꌠꄉꈁꍔꐯ，ꋭꋽꃅꊌꐨꀊꂥꇨꌠꋊꄻ，ꏦꀋꊒꊌꐨꋊꑣꇧꎭ，ꃪꌧꇤꃅꐙꌠꁷꄻꐛꊂꏓꐛꌠꄹꇙ。

（39）ꏓꂱꉌꃹꌠꂘꑘꀞꋒ。ꃅꋊꀊꏀꋎꌠꃅꇏꄻꊿꉙꂘꌠꋉꃆꃄꌬ，ꉪꇐꍔꍞꌷꈉꌋꆀꐧꋦꌷꈉꇿꋌꐥꃅꐮꏓꐊꌠꊥꎆ，ꈯꎟꉙꂘ、ꋽꇐꉙꂘ、ꑘꃅꉙꂘꌠꊋꀥꇱ，ꂘꑘꈋꍣꉻꑫꄻꉾꃪ。ꊻꂷꐛꐈꌠꌋꆀꐮꄉꄐꌠꂘꑘꅐꀦꁆꇱꉺꏦꄻꐛꒆ，ꌷꈎꊻꂷꀊꌃꃅꇓꈓꏦꎫꇬꃹꌠꂘꑘꅐꀦꇲꁵꌠꍔꒉ。ꎍꐽꃅꁌꀋꈁꂘꑘꈍꈐꍔꒉ，ꋭꑘꂘꑘꃅꈎꄯꎴꌠꎹꎥ。ꅉꃀꂘꑘꉾꃪꍔꐯꊇꁧꉀꐕꌠꄹꇙ，ꋭꑘꂘꑘꊈꂄꐮꆽꏣꃅꀻꎆ、ꌷꂾꂘꑘꊈꂄꈲꈴꃅꀻꎆꌠꏓꇲ，ꎃꐚꇨꍏꌶꅉꀞꄻꅐꀦꍔꒉ，ꐋꀋꌡꂘꑘ、ꌐꁨꂘꑘꀞꋒ。ꀊꂥꊐꌠꂘꑘꊇꁧꉀꐕꅓꐨꍔꐯꌠꄹꇙ，ꊈꂄꀪꈈꂘꑘꌶꌺꎹꄉꈁꍔꒉ。ꃅꑘꌶꅉꌶꅉꀞꄐꊋꉀꐕ，ꐛꋲꐨꊨꄅꌠꀊꂥꊐꌠꃅꑘꌶꅉꋈꄻ。ꉹꁌꀞꄻꂘꑘꀻꎆꌠꄐꏁꋊꍬ。ꑟꐨꀊꂥꌠꂘꑘꉇꉻꏭꁉꃑꌠꍔꒉ。ꂘꑘꌧ꒜ꉌꊈꍔꆙ，ꑟꐨꀊꂥꌠꂘ꒜ꁥꌠꉘꉚꂘꄻ，ꀉꇨꃅꂘ꒜ꊌꐨꏦꀧ。ꌶꅉꑱꈐꐧꋦꋮꐊꃅꊿꉙꂘꌠꉺꏦꄻꐛꒆ。ꃹꅼꃅꂘꑘꃷꂷꃅꐙꌠꄐꇐꏤꁈꃄꌬ，ꐥꍂꃅꌶꄻꌠꄉꉻꁧꃤꃅꌠꄻꃪ。

（40）ꐧꋦꏦꀧꉻꑫꄻꐛꒆ。ꅉꀨꃀꌠꀨꎹꄜꏂꀧꇩꏤꑭꊂꃅꏓꇲꌠꄹꏦꄻꉾꃪꄷꀋꁧꃄꌬꑞꅉꑟ，ꐳꃅꀉꑌꊐꌠ、ꈯꌬꀉꑌꌠꃀꌠꀨꎹꄜꏂꀧꉻꑫꀻꎆ，ꊌꐨꏤꄻꌠꌋꆀꋊꄻꌠꉺꏦꄻꐛꒆ，ꋍꁘꋍꁘꃅꇓꈓꇓꉈꀀꊿꅉꃀꃀꌠꀨꎹꎆꉀꐕ。ꀉꑌꊐꌠꆅꉁꏦꀧꉻꑫꄻꐛꒆ，ꅉꀨꆅꉁꄜꏂꀧꌜꊐꌠꏓꇲꌠꄹꎆ，ꁬꋌꏓꋧꄉꃼꌠ、ꆅꉁꄜꏂꀧꁵꄻꌠꌋꆀꋒꇈꌠꎆꀨꌫꄻꌠꏱꁈꄻꃪ。ꃅꅍꀋꊌ、ꑘꃅꂷꊂꌸꄜꏂꀧꉱꑷꐨꍔꐯ，ꃅꑘꉮꄻꏦꀧꄹꏦꄻꐛꄻꐛꒆ。ꐧꋦꄜꏂꀧꃆꂮꆹꏮꊪꊛꏱꁈꄻꉾꃪ，ꋭꋽꃅꃅꅍꊌꌠꊿ、ꂿꑘꊿꊋꃅꌠ、ꃅꅍꊌꄟꀊꏀꌠꇬꌤꃅꊿꄜꏂꀧꇬꐊꈽꐨꉀꐕ。ꐧꋦꄜꏂꀧꅧꌗꄹꏦꄻꐛꒆ，ꐪꊛꄉꇩꁨꎆꀨꁆꏮꌊꄉꐧꋦꄜꏂꀧꎆꀨꇬꇱꇎꎻ，ꐧꋦꄜꏂꀧꎆꀨꀊꉗꃅꇿꋌꐥꃅꏓꊭ、ꏓꇲꋊꄻ、ꁌꀧꁌꎆꌋꆀꋬꂻꍞꏲꉺꏦꄻꐛꒆ。ꋍꑞꋍꑵꃼꇇꑘꄜꏂꀧꀥꇱꏦꀧꂿꄐꋊꇤ。ꇩꏤꑭꊂꋍꃱꃅꌠꐧꋦꄜꏂꀧꄉꉻꁧꃤꃅꐽꈉꌋꆀꇇꈴꀞꄻꏲꂠꁧꃤꃅꌠꄻꃪ。ꐧꋦꈭꋏꇇꀨꉻꑫꄻꐛꒆ。ꑳꈣꐏꃀꌠ、ꐤꎭꀊꉘ、ꆐꅑꊿꑠꊿꁥꌠꏭꁧꃤꃅꏦꀧꌠꉻꑫꄻꉾꃪ。ꅉꀨꐗꄁꁧꃤꃅꄹꏦꄻꐛꄻꐛꒆ。ꌺꃰꌋꅪꐥꊯꌠꅉꀨꇩꁈꌭꈬ，ꌋꅪꀊꉘꏦꊒꌅꈌꈲꁧꏦꀧ。ꎞꆏꂽꑼꁧꃤꃅꏦꀧꌠꊋꀥꇱ。

（41）ꑳꇤꁨꇐꊇꁧꀊꂥꃅꀻꎆꌠꄹꇙ。ꐳꃅꑳꇤꁨꇐꀻꎆꈁꏦꀊꏀꌠꏓꄻ，ꃷꇐꑳꇤꀖꁉ、ꎆꏓ、ꃷꄻꑠꅉꃀꄹꏦꄻꉾꃪ。ꏦꀧꐨꐥꌠꀀꑳꇲꁵꌠꄻꃪ，ꇓꈓꏦꎫꃄꎆꒃꊿꁥꌠꌋꆀꋍꑞꋍꉹꊋꋠꌠꑱꈐꅉꀨꀀꑳꈉꐨꇬꇎꈴ。ꇓꈓꉜꄉꏱꁈꏂꄉꄻꃪꃅꐙꌠꀀꑳꁦꎆꃅꇲꁵ。ꋬꂻꀀꌒꀊꃴꀑꁮꌠ“ꑳꉾꌠ”ꋈꄻ，ꑳꇤꊇꁧꉀꐕꋉꃆꌋꆀꎊꑘꁧꃤꃅꊇꁧꉀꐕꃅꐨꃄꌬ。ꑳꇤꀑꇬꈭꏮꇬꃅꋬꂻꏲꂠꌠꄹꏦꄻꐛ。

（42）ꐳꃅꋬꂻꍏꇩꋈꄻ。ꋬꂻꌠꄻꂴꄉꌠꀻꎆꄐꇐꏤꁈꃄꌬ，ꋬꂻꊥꎆꏱꁈꄹꏦꉻꑫꄻꐛꒆ，ꇩꉂꁦꎴꃄꄻꇿꋌꉀꐕ，ꊻꂷꐽꏡꃅꇬꉘꇉꄉꌠꈎꄜꊌꐨꌋꆀꏓꂱꇭꀧꋬꂻꌠꑟꐨꉀꐕ。ꄉꉻꁦꎴꄐꊋꄻꀉꇨ，ꊋꀥꇱꄉꆄꈻꋎꍅꉻꑫꋈꄻ，ꇵꆅꀉꒉꀊꂾꌠꄴꏮꋎꍅ。ꆅꉁ、ꆅꉁꄜꏂꀧ、ꆅꉁꁬꋌꋮꐊꃅꀻꎆꌠꌋꆀꏱꄻꉺꏦꄻꐛꒆ，ꊐꁸꄉꆅꉚꆅꉃꌠꊥꎆ。ꉻꈲꃅꐙꌠꌌꄐꇺꅍꃅꄉꃹꅼꃅꉻꀞꆅꉚꅉꌤꃅꊿꃷꁨ、ꁧꃤꃅꁌꏤ、ꃄꎆꄹꏦ、ꏓꇱꍞꏲꌠꄺꀱ，ꊋꀥꇱꄉꑤꐎ、ꅉꂫꊐꌠꆅꉁꏲꉻꏮꈴꌠꏦꀧ。ꆅꉁꏲꉻꂿꄐꉆꈉꏤꌠꌋꆀꄐꉻꄻꃪ，ꆅꉁꁦꎴꅉꃀꀉꇨꋉꃆꃄꌬ，ꉹꁌꃅꋬꂻꌠꃷꂷꀑꊋꃅꐙꌠꋈꄻꌠꄹꎆ。ꊋꀥꇱꄉꆅꏡꎴꌠꏓꇱꃅꄴꏮꋎꍅ，ꄴꏮꉃꄻꌒꇁꏲꂠꌠꈁꉬꃬꏣꇬꃅꁧꃤꃅꌠꀻꎆ。ꈁꉬꁁꏯꃅꃛꊸꃅꆅꉚꃛꊸꃅꈭꋏ、ꌦꒉꏦꀧꌋꆀꃛꊸꊜꄻꌠꄐꊋꉀꐕ。ꊋꀥꇱꄉꆅꉁꁦꎴꊿꁥꌠꄐꊋꌋꆀꃅꇏꋈꄻ。ꍏꑱꁬꋌꊪꊛꏀꀺꌠꄹꎆ，ꍏꑱꑭꑱꆅꉁꁬꋌꏓꐊꌠꊥꎆ。ꁬꋌꌋꆀꆅꉁꌬꅍꀻꎆꏀꀺꌠꊋꁈꄏ。ꊋꀥꇱꄉꉌꇗꋬꂻꌠꌋꆀꉌꊈꁦꎴꌠꁧꃤꃅ。

（43）ꊻꂷꊇꁧꀊꂥꃅꀻꎆꌠꊥꎆ。ꊿꈁꐥꌠꇬ、ꀑꇬꈭꏮꈁꉬꌠꇬꃅꉱꑷꌠꊻꂷꁧꃤꃅꉻꑫꄻꐛꒆ。ꏣꀋꑌꌠꑶꋦꇤꄂꉜꐨꄕꊪ，ꒆꉘꊋꁈꄏꏱꁈꌋꆀꊋꊡꏁꁈꄻꃪ，ꀉꑳꉗꄻꁥꇱꎆꌋꆀꊿꑴꅉꊌꐨꇗꏸꄂꈎꏱꁈꂿꄐꋊꇤ，ꇿꋌꐥꃅꑱꈐꒆꉘꉘꉚꉙꂘꎆꀨꀁꋌꊰ。ꒆꉘꄜꏂꀧꄹꏦꄻꉾꃪ，ꒆꉘꑬꆏꄹꏦꃅꑞꅉꑟ，ꏛꃅꃴꑌꌠꉈꇬꃅꐨ、ꃴꑌꉗꄻꌋꆀꀉꑳꒆꎼꇁꇬꆐꅑꌠꄴꏮꄐꊋꉀꐕꎖꄎꌠꃄꌬ。ꃹꅼꃅꀉꑳꁠꉘꁧꃤꃅꎆꁥꁵꌡꀠꃅꉚꌠꃅ，ꈲꈴꌠꀉꑳꁠꉘꌋꆀꀉꑳꁠꂘꌠꋍꉻꃅꁧꃤꃅꌠꀻꎆ，ꋍꁘꋍꁘꃅꄚꃆꂮꐥꌠꄹꏦꄻꐛꒆ。ꊋꀥꇱꄉꌋꅪꌋꆀꀊꉘꋬꂻꌠꁧꃤꃅ。ꏣꀋꑌꃅꊻꂷꃀꌠꇁꌠꊜꄻ，ꃀꌠꀨꎹꌤꑘꌋꆀꅐꑘꋮꐊꃅꀻꎆꌠꏱꁈꉺꏦꄻꐛꒆ。ꅉꀨꃀꌠꀨꎹꁧꃤꃅꌠꇲꁵꌠꄻꃪ，ꇓꈓꇓꉈꃀꌠꀨꎹꁧꃤꃅꈄꏍꄻꉾꃪ，ꊋꀥꇱꄉꄉꉻꉁꈾꃀꌠꐛꈴꌠꇬꄉꄐꃅꌋꆀꏢꑲꅍꀋꐥꃅꄺꀱ。ꆅꉁꉗꄻ、ꆅꉁꀨꎹꏓꐊꌠꁧꃤꃅꌠꀻꎆ。ꀊꉗꃅꀨꎹꌠꄜꏂꀧꄹꌬ，ꄐꅍꀋꐥꇯꁧꌠꃀꌠꊿꀨꎹꉻꑫꄻꐛꒆ，ꌒꈴꀨꎹ、ꆅꌌꀋꉪꉃꄻꀨꎹꁧꃤꃅꇲꁵꌠꍔꒉ。ꎍꐽꋭꋽꃅꋍꁘꋍꁘꃅꆹꌠꏦꏤꎞꆏꈎꄜꄯꎴꌠꃄꌬ，ꃅꅍꊌ、ꐧꋦꄜꏂꀧꑠꁁꏯꈎꄜꏢꑲꏱꁈꄻꃪ，ꏣꀋꑌꃅꃀꌠꊾꊋꅐꀦꀖꁉ，ꀑꐎꎆꏣꀻꎆ。

（44）ꎍꐽꃅꅉꀨꄉꉻꁧꃤꃅꌠꐽꏡꈴꌠꄹꎆ。ꅉꀨꄉꉻꁧꃤꃅꌠꐽꏡꈴꌠꈋꍣꎕꏦꄻꐛ，ꅉꀨꄉꉻꁧꃤꃅꈍꈐꌋꆀꐊꇐꄻꉾꃪ，ꅉꀨꄉꉻꁧꃤꃅꌠꐽꏡꈴꌠꃅꇫꑟꌠꁻꌐ、ꈴꈜ、ꏁꁈꏤꄻ，ꄉꉻꁧꃤꃅꌠꀊꅰꀉꑌꃅꌌꅉꂫꊐꌠꇬꒉ、ꌌꂿꑘꁡꇤꇬꉱꑷ、ꌌꃅꋮꈜꎴꃅꄷꌋꆀꐥꐨꊋꋠꌠꉹꁌꏭꉜꄉꎎꌠꄹꇙ，ꅉꀕꀀꋦꊻꂷꌋꆀꐮꄉꄐꌠꄉꉻꅐꀦꁆꄻꉺꏦꄻꐛꒆ。ꊋꀥꇱꄉꑤꏱꁕꅉꀨꄉꉻꁧꃤꃅꌠꇲꁵꌠꏓꇲ，ꎆꇱꏦꀧꎴꈲꉺꏦꄻꉾꃪ。ꐊꑷꃅꃹꅼꃅꌤꑘꌤꃅꅉꄺꀱ。

ꊰꑋ、ꎆꏣꐧꋦꀻꎆꌠꐊꑷꃅꀊꃴꉹꏮꌠꐳꀥꇱ，ꎔꃨꍏꇩꋈꄻ

ꀊꃴꀻꎆꌠꆹꍏꇩꈁꏦꐛꏀꈴꌠꐛꊈꐛꑊꊨꄅꌠꉬ。ꒉꆧꁧꃴꌠꆹꐎꁧꏂꁧꉬꌠꉪꉻꑌꈬꌋꆀꃄꄻ，ꌋꋊꑞꅉꑟꌋꐮꐽꌠꌌꈻꌬꅍꃅꄉ，ꋮꐊꃅꌋꊨꒊ、ꍍꊨ、ꃴꆧꍔꐯ、ꉀꎆꌠꄹꎆ，ꒆꉻꋬꂻꇊꑴꄻꈫꈈ，ꀊꃴꀻꎆꇙꊋꄻꀉꇨ。

（45）ꐪꊛꄉꃹꅼꃅꍍꆀꄴꏲꈢꇓꀖꌠꌋꆀꒆꉻꉻꑫꄻꃪꌠꄹꎆ。ꋦꈭꀧꌋꃅꌠꆹꏓꂱꎁꃅꃅꌠꌭꈬ，ꐊꑷꃅꊒꌸꈆꑪꃅꏦꃤꇬꈴꄉꍍꆀꏱꄻꌠꃅꑞꅉꑟ，ꀊꅰꃅꇁꀦꇬꄉꏱꄻꌠꉜꁨ，ꍍꊨꌋꊨꌠꋮꐊ、ꀉꑌꑵꍍꆀꐥꇐꋎꍅꌠꋮꐊ、ꃄꁕꏱꄻꌠꋮꐊꌠꊋꇨꇱ，ꃹꅼꃅꃅꑆꃴꇉꀕ、ꒈꒉꐝꍠꀕ、ꃄꅉꁦꎴꌠꐏꁇꃄꄻꌊꉾ。ꐳꃅꍍꇐꋊꃑꈌꁧꄹꏦꌌꈯꄜꃅꄉꌠꀋꇙꍍꇐꇁꀦꍞꏲꄹꏦꃄꌬꑞꅉꑟ。ꈯꊈꀉꀜꏓꇱꏱꄻꃅꐨꃄꌬ。ꊋꀥꇱꄉꋦꈭꃨꆰꐨꄴꏮꋎꍅ，ꃹꅼꃅꍍꆀꐥꇐꀊꏀꌠꏱꄻꌠꄹꎆ。ꒆꉻꋦꈭꎕꏦ、ꍞꎖ、ꈋꍣꌋꆀꍤꎖꄹꏦꄻꐛꒆ。

ꁦꇉꀆꐒꌩꏪꋠꃅꎾꃝꅔꏂꂤꏂꋍꉻꃅꀧꌋꃅꌋꆀꉻꑫꃅꏱꄻꌠꌭꈬ，ꏓꇲꄉꀋꉬꀋꉆꌠꒆꉻꉻꑫꀧꌋꃅꌋꆀꄺꀱꐛꀕꌠꋉꃆꀉꒉꀊꂾꌠꄹꎆ。ꏦꇨꃅꒆꉻꀧꌋꃅꑟꅪꐏꈬ，ꐊꑷꃅꇩꏤꋍꏅꈩꅉꌌꀨꄜꃅꄉꌠꋌꐛꀧꌋꃅꅉꉻꑫꋈꄻꌠꄹꎆ，ꊱꁨꃅꇩꏤꋍꏅꈩꅉꀊꏀꌠꄻꐛ。ꊋꀥꇱꄉꒆꇐꀉꑌꑵꃅꐙꌠꀧꌋꃅ。ꒆꉻꀧꌋꃅꄺꀱꐛꅉꐛꌠꇿꋌꄤꎖꌠꃅ。ꈆꑪꃅꄉꈁꀉꒉꃅꇩꏤꃄꅉꌩꊪꇓꊪꃄꄻꌠꃅ，“ꌒꀙ”ꋉꃆꈢꇓꀖꌠꃅꋒ。ꊋꀥꇱꄉꏾꊗꉗꀑꅔ꒜ꑠꃅꄷꒆꉻꇊꑴꋈꄻ。ꀉꑌꑵꃅꐙꌠꒆꉻꁵꊒꉺꏦꄻꉾꃪ，ꑞꃅꋭꌠꑞꃅꃅꒆꉻꅐꇐꁌꐨꃅꇫꑟꌠꈴꈜꍔꐯ。ꊋꀥꇱꄉꆂꒉꎾꃝꒈꇉꀋꉬꀋꉆꌠꉻꑫꃅꏱꄻꌋꆀꒆꉻꀧꌋꃅ。ꍤꏦꒊꃀꊰꈎꉛꈹꀋꉆꌠꃄꌬꋒ。

（46）ꐳꃅꀊꏀꉹꌠꊋꀦꉻꑫꋈꄻ。ꐪꊛꄉꊋꀦꀊꏀꇲꁵꍆꐪꉀꐕ，ꐈꇓꊋꀦꋬꂻꉈꊪꉆꊱꁨꃅꎃꊐꌠꄹꎆ，ꊋꇤꄉꀊꏀꉹꌠꄆꊋꉻꑫꏓꄻ，ꊋꀦꀉꇨꌠꇩꏤꋈꄻ。ꃅꆳꈨꑭꒉꉿꑠꊋꀦꀉꑌꑵꃅꐯꇯꌬꌠꌭꈬ，ꀊꄶꄉꋊꃬꌠꌋꆀꌞꉇꎭꌠꏓꇲ，ꁦꎴꊋꀦꊇꁧꀊꂥꃅꀻꎆꌠꊥꎆ。ꊋꀥꇱꄉꐈꇓꊋꀦꁦꎴꇿꋌꀊꂥꃅꌌꌫꄻ，ꊖꌋꄆꄺꀱꊐꐕꌠꌋꆀꁗꏒꊖꌋꎃꊐꌠꄹꎆ。ꐊꑷꃅꄆꊋꉻꑫꐯꅋꐮꑣꌠꌋꆀꋬꂻꍕꎇꐨꑟꐨꉀꐕ，ꈆꑪꃅꒉꈺꄻꊋꊭꊎꌠꄐꄻ，ꊋꀉꒉꃅꇤꄉꀊꏀꉹꌠꊋꊭꊎꌠꀻꎆ，ꐳꃅꀑꊋꄆꈄꏍꌋꆀꐭꄆꈄꏍꋈꄻ。ꂫꇬꊋꌬꄆꌗꌬꈴꑟꐨꉀꐕ，ꊋꀦꌬꈧꀊꃴꌋꀁꂥꌠꄹꇙ。ꐳꃅꀊꏀꉹꌠꊋꀦꉻꑫꇬꄉꄐꌠꃷꎏꌋꆀꁌꏤꉺꏦꄻꐛꒆ。

（47）ꏣꀋꑌꃅꎍꐽꃅꌋꋊꑞꅉꑟꌠꄹꎆꌋꆀꃅꇫꑟ。ꌋꋊꃑꈁꉬꃷꁨꌋꆀꇨꐨꑍꑵꋎꍅꌠꃄꌬ。ꃹꅼꃅꊋꀦꏎꏸꌋꊨꒊꄺꀱꌠꃄꌬ。ꊖꌋꌋꆀꇓꋌꌬꈧꑞꅉꑟꌠꄹꇙ。ꌋꋊꃑꏓꌗꌗꐚꉻꑫꄻꉾꃪ，ꎍꐽꃅꃅꄷꌋꍤꎖ、ꉹꑘꌋꏱꄻꋎꍅ、ꎆꏂꑘꌋꏲꂠ、ꐘꑘꌋꈋꍣ、ꅐꇐꌋꐪꊂꑠꏱꁈꄹꏦꃄꌬ。ꁊꁸꃅꐙꌠꊋꀦꀻꎆ，ꌋꀋꐥꇮꃅꅉꌋꆀꅉꁍꋈꄻ。ꇩꏤꑭꊂꌋꋊꃑꌅꈌꃼꇇꃅꃷꎏꉱꑷꈍꈐꍔꒉ，ꐳꃅꊸꑳꌗꊈꉌꇗꃅꋊꃑꐨꊨꒊꌠꃼꇇꃷꎏꋈꄻ。ꀊꃴꌋꀁꂥꎕꏦꉻꑫꄻꐛꄻꐛꒆ，ꇩꏹꏦꋪꎕꏦꄻꉾꃪꌋꆀꐯꊛꐮꏚꍆꌠꄐꏁꌠꄹꇙ。ꃄꀑꃅꌗꐛꐈꌠꇬꄐꄮꌠꌤꃅꉻꑫꄻꉾꃪ，ꃄꀑꃅꌗꐛꐈꌠꈜꀕꇈꃄꀑꃅꌗꀋꉾꀋꃪꇨꌠꏭꊜꄻꌠꄐꊋꉀꐕ。

（48）ꐳꃅꀊꃴꒃꅐꐥꐨꐤꄟꏓꐛ。ꃹꅼꃅꒆꉻꋦꈭꃅꄷꁸꄉꏱꄻꋎꍅꌠꄹꎆ，ꊋꀥꇱꄉꇩꏤꃄꅉꈥꈉꄐꎖꌠꌋꆀꄻꐯꊛ，ꋮꐊꃅꅐꑘꄐꉻꄻꃪ。ꇮꑘ、ꇓꈓꇓꉈꋈꄻ、ꈭꈜꎞꎭ、ꊋꀦꑠꀋꉬꀋꉆꁁꏯꀊꃴꌋꀁꂥꉹꏮꌠꄹꇙ。ꅐꀦꈁꉬꃷꁨꏲꂠꌠꌋꆀꐊꑷꃅꏎꏸꌠꄹꏦꄻꉾꃪ，ꑶꌩꀖꑘꉹꁸꌠꌋꆀꅐꀦꈴꃅꌫꄻꌠꑟꐨꉀꐕ，ꀰꏮꎆꏣꀻꎆꌠꊥꎆ。ꐪꊛꄉꇩꏤꒆꉻꌧꑳꃅꉚꅉꋈꄻ，ꎔꃨꍏꇩꂴꅑꄉꃄꄻꅉꋈꄻ，ꀊꃴꀻꎆꀊꂥꅉꋈꄻ。ꀊꃴꌋꀁꂥꃅꀻꎆꌠꊥꎆꌠꏱꎆꇗꏸ、ꎆꒉꎆꇁ、ꎆꇱ、ꁌꏤ、ꈆꑪꇮꇐ、ꋦꈭꀧꌋꃅꏱꁈꃅꑞꅉꑟ。ꀊꃴꌬꈧꌠꊋꊡꉺꏦꄻꐛꒆ，ꀊꃴꌋꀁꂥꌠꐥꐨꐤꄟꄹꌬ。

ꊯꌕ、ꇩꏤꋬꂻꉻꑫꌋꆀꄐꊋꐛꏀꈴꌠꄹꎆ，ꑟꐨꀊꅰꀊꂥꌠꋬꂻꍏꇩꋈꄻ

ꋬꂻꍏꇩꋈꄻꌠꆹꍏꇩꈁꏦꐛꏀꈴꌠꐊꇐꀋꉬꀋꉆꌠꉬ。ꀋꇙꀋꑐꃅꉻꄜꇩꏤꋬꂻꉜꐨꃄꌬ，ꍏꇩꐛꐨꐧꋦꉪꏦꐧꋦꏱꄻꈝꃀꍬ，ꐧꋦꍅꁍꀕꇈꊱꁨꌠꄉꀧ。

（49）ꇩꏤꋬꂻꉻꑫꄻꐛꒆ。ꏓꋧꋍꃱꃅ、ꇿꋌꀊꂥꋦꒉꌠꇩꏤꋬꂻꏲꂠꏦꉻꄻꈫꈈ，ꐳꃅꋬꂻꐛꊂꀊꏀꌠꏓꄻ，ꇩꏤꋬꂻꀧꌋꃅꌠꌋꆀꄺꑣꌠꄐꇐꏤꁈꑴꇙꐨꄻꀉꇨ。ꄐꇐꏤꁈꌌꄐꏁꅍꃅꄉ、ꏱꁈꌌꇇꒃꅉꃅꄉ、ꏦꏲꌠꌌꏦꀧꅍꃅꄉ、ꃨꆰꐨꄴꏮꋎꍅꌠꌌꑞꅉꃅꄉꌠꌭꈬ，ꇩꏤꋬꂻꏦꏲꉻꑫ、ꄐꇐꏤꁈꉻꑫ、ꏱꁈꉻꑫ、ꃨꆰꐨꄴꏮꋎꍅꉻꑫꄻꉾꃪ。ꇩꏤꋬꂻꀋꉬꀋꉆꁁꏯꌋꆀꀋꂿꑘꌐꐘꋮꄮꉺꏦꄻꀉꇨ，ꃛꊸꊜꄻꐛꐈꊜꄻꌠꇿꋌꄐꊋꉀꐕ。ꇩꏤꋬꂻꆽꎍꄹꏦꃅꑞꅉꑟ，ꃬꏣꈁꐥꌠꐊꊈꈁꐥꌠꋮꐊꃅꏓꇙꌠꊥꎆ，ꉻꑫꏓꊋꏓꐛ。ꉇꉻꃆꂮꐥꌠꇩꏤꋬꂻꉺꏦꄻꉾꃪ，ꎿꉈꋬꂻꏦꀧꉻꑫꏓꄻ，ꊋꀥꇱꄉꏢꑲꌠꏭꁏ、ꈌꄀꇇꏿꌠꏭꁏ、“ꇇꎴꏱꄻ”ꌠꏭꁏꌠꉈꈽꌠꃅ，ꃹꅼꃅꇩꏹꏦꃤꍬꌬꋬꂻꌠꇷꃅ，ꅉꆺꑭꊂꋬꂻꏱꄻꌠꄻꉾꃪꌠꄹꇙ。ꀉꇨꃅꇩꏤꋬꂻꉙꂘ，ꏓꂱꐏꈜꄻꈫꈈꃅꄉ。

（50）ꊋꀥꇱꄉꀋꉬꀋꉆꁁꏯꇩꏤꋬꂻꄐꊋꋈꄻ。ꃶꐚꃅꉈꈽꄎꃶꐚꃅꌬꉆꌠꇩꏤꋬꂻꄐꊋꄺꑣ，ꇩꏤꎴꏲꑘꒃ、ꎆꏣꁣꀋꐥꎍꐽ、ꏓꂱꀀꌒꃅꏾꌠꇬꃆꂮꐥꌠꋬꂻꀉꒉꀊꂾꌠꏦꀧꌠꌌꀨꇬꄉ，ꍔꍞꋬꂻꌠꐏꁇꌠꄻꉘꃀꇬꐕꄉ。ꇩꏤꋬꂻꅉꃀꏦꀧꌠꌆꈬ，ꋚꂷ、ꊋꀦꅐꀦ、ꅐꑘꃬꏣꇲꁵꃬꏣꀋꉬꀋꉆꌠ、ꅉꃀꉁꈾꀉꒉꀊꂾꌠꋬꂻꌠꄉꀧ，ꊋꀥꇱꄉꄐꇐꏤꁈꐨꐥꌠꇑꇓꅐꀦꍤꎷꀖꁉꌋꆀꏓꊭ，ꒉꅐꀦꏓꋧꋬꂻꌬꈧꑟꐨꉀꐕ，ꄐꇐꏤꁈꈴꈜꋬꂻꌠꀧꌋꃅ，ꇩꏤꄐꇐꏤꁈꈯꄔꃅꄷꋈꄻꌠꌋꆀꀋꉬꀋꉆꌠꅐꑘꄐꌬꌠꄹꎆ。ꊋꀥꇱꄉꈄꏍ、ꃷꁨꊫꌐ、ꊿꄻꀑꊋ、ꒆꇐ、ꒆꉻ、ꉿ、ꃅꈯ、ꎿꅼ、ꁯꋮꃅꄷ、ꃅꈯꀁꂥꑠꏀꄓꁁꏯꇩꏤꋬꂻꄐꊋꋈꄻ。ꀋꉬꀋꉆꁁꏯꃨꆰꐨꄴꏮꋊꑣꄐꊋꉀꐕ，ꏓꇲꄉꑳꇤꁨꇐ、ꃅꄷꍔꃚꎝꃆ、ꐧꐭꎆꒉꎆꇁꏲꉻꑠꃨꆰꐨꊱꁨꃅꋊꑣꌠꄹꎆ，ꏦꇨꃅꉻꑫꃅꐙꌠꃨꆰꐨꄴꏮ。

（51）ꄉꉻꋬꂻꏱꄻꑟꐨꉀꐕ。ꄉꉻꋬꂻꉻꑫꄻꉾꃪ，ꄉꉻꋬꂻꏱꄻꈁꏦꄹꇙꌊꌤꅐꂾꄴꏮꌠꏭꉜꄉꉹꏮ。ꊋꀥꇱꄉꃄꀑꃅꑊ、ꒉꐈꐪ、ꅉꊈꉮꌸꍞꎖꂴꄛꇰꌗꋏ，ꉮꄵꉮꊨꉮꌸꈭꋏꌠꌋꆀꋋꇅꃅꅐꇁꌠꄉꉻꌤꀉꒉꀊꂾꌠꀞꄻꏦꀧꄐꊋꉀꐕ，ꊋꀥꇱꄉꃛꊸꊜꄻꄐꇺ、ꋬꂻꒃꅐ、ꋠꇐꁬꋌꋬꂻꑠꌤꃅ。ꀋꂿꑘꌠꅉꃀꉁꈾꊇꅉꋬꂻꑟꐨꉀꐕ，ꇿꋌꐥꃅꌤꆿꀋꇰꀋꉈꀉꒉꀊꂾꌠꇫꅐꇁꌠꋎꍅ。ꃹꅼꃅꐧꋦꋬꂻꉻꄜꃅꄴꏮꋎꍅꌠꉻꑫꌋꆀꄐꊋꋈꄻ，ꐧꋦꑘꒃꀧꌋꃅꌠꆽꎍꐨꃅꑞꅉꑟ，ꋍꏅꃅꄴꏮꋍꏅꃅꏱꄻꌠꊋꃤꀻꎆꀉꇨꇁ，ꀋꂄꌠꌩꎳꄷꅠꌠꋊꑣꌠꅉꀕꃅꃅꌠꉺꏦꄻꐛꒆ，ꄆꑠꈄꏍꇬꈴꄉꊏꀸ、ꅋꇐꑽꃤꐆꑠꄴꏮꌋꆀꅥꍅꌠꇬꊋꃤꀥꇱ。ꏓꇱꏱꄻꈯꄜꏦꐛꃅꋈꄻꌠꄹꎆ。ꃹꅼꃅꈄꏍꈥꈉꋬꂻꏓꇱꏱꄻ,ꊋꀥꇱꄉꊿꑴꅉꈴꌗꀧꌋꃅ。ꀉꇨꃅꒆꆹꀋꑟꊿꏦꐆꑽꃤꐆꌠꄴꏮꌋꆀꏱꄻ。ꐊꑷꃅꎃꊒꃅꄝꏯꌠꌋꆀꏦꇨꌠꄻꐯꇯꌠꅓꑘꏱꁈꃄꌬ,ꏦꃤꇬꈴꄉꏦꐆꑽꃤꐆꌠꅓꀞ,ꑽꃤꅓꃄꌬꌠꊇꁧꇿꋌꉀꐕ。

（52）ꐧꋦꏱꄻꉻꑫꄻꉾꃪ。ꉻꑫꃅꏱꄻ、ꏦꃤꇬꈴꄉꏱꄻ、ꏓꇱꃅꏱꄻ、ꇁꀦꇬꄉꏱꄻꌠꌭꈬ,ꐯꇯꋈꄻꐯꇯꏱꄻꐯꇯꈲꊌꌠꐧꋦꏱꄻꄹꏦꄻꉾꃪ,ꐧꋦꏱꄻꐛꏀꈴꌠꄹꎆ。ꐧꋦꌤꃅꏦꉻꉺꏦꄻꐛꒆ,ꐧꋦꏱꄻꏱꁈꌋꆀꏦꃤꏦꇗꉻꑫꄻꉾꃪ。ꊋꀥꇱꄉꎆꏣꎀꍹꀊꏀꌠ、ꐧꋦꎀꍹꀊꏀꌠ、ꃅꅍꊌꊿꁥꀊꏀꌠꄈꅿꋈꄻ。ꊋꀥꇱꄉꐧꋦꎀꍹꉘꉚꏲꂠ,ꉹꑘꑠꉼꃼꇇꉼꄺꀱꀻꎆꌠꄹꇙ。ꊋꀥꇱꄉꄈꋈꄻꌠꌌꅉꂫꊐꌠꏱꄻꌠꌋꆀꅉꂫꊐꌠꍔꌅꋈꄻꌠꄐꏁ,ꐊꑷꃅꑣꍔ(ꏦꈜ)ꃅꎁꃄꄻꌠꌤꆿꃷꁨꋏꄯꒉꃄꌬ,ꋂ(ꋥꁕ)ꌤꃅꌤꆿꃹꉆꄹꏦꄻꉾꃪ。ꃅꋊꀊꏀꋎꌠ“ꃖꐇꎖꋪ”ꌭꈬꌋꆀꀻꎆ,ꊋꀥꇱꄉꑣꋂꏱꄻ,ꋥꁕꏱꄻꌠꄻꉾꃪ。ꏓꂱꉹꁌꀨꄜꂿꄐꋊꇤꅐꇁ,ꋍꑞꋍꁁꏯꄐꏁꌊꊱꁨꃅꐧꋦꏱꄻꌠꇬꃅꈽ。ꈄꏍꇬꈄꏍꉈꋮꐊꃅꏱꄻꌠꄹꎆ。ꊋꀥꇱꄉꅉꂫꊐꌠꁧꃤꃅꏲꂠꊋꃤꇱꄻ,ꁧꃤꃅꉁꈾꌋꆀꌫꎆꏦꀧꉺꏦꄻꉾꃪ。ꇓꈓꀀꊿꉻꏤ、ꋂꇗꋂꏦꑠꂿꄐꋊꇤ,ꊋꀥꇱꄉꑱꈐꑱꈐꉙꂘꑱꈐꃅꇏꋈꄻ,ꄹꆴꀺꆦꌠꄹꎆ,ꇿꋌꐥꃅꑮꑟꅪꏷꊿꌦꑳꆅꇬꋻꅑꀋꉾꑠꌤꃆꏱꄻ。

ꉹꁌꏓꋧꁧꃤꃅꌠꌤꃅꉺꏦꄻꉾꃪ,ꐧꋦꏱꄻꉹꁌꅉꃀꌆꈬ。ꊋꀥꇱꄉꉪꇐꍔꍞꄐꏁ,ꋍꑞꋍꉹꐧꋦꊿꁥꌠꏭꁧꃤꃅꏲꂠꌠꄻꃪ,ꈲꁧꐮꃆꂮꋮꄮ、ꏦꊒꌅꈌꈲꁧꏦꀧꄹꏦꄻꐛꒆ,ꊋꋠꌠ、ꊋꁧꌠꊿꁥꌠꏭꉈꇬꑓꇬ。ꐧꋦꉌꇗꁧꃤꃅꉻꑫꌋꆀꆽꀠꇁꉆꌠꋊꎵꄐꏁꉺꏦꄻꐛꒆ。ꇓꈓꀀꊿꊸꑟꑠꄉꉻꁧꃤꃅꐽꈉꂿꄐꄻꀉꇨ,“ꉹꁌꇴꅍꐥꆏ、ꉢꇫꀱꅍꐥ”ꌠꄹꇙ。ꉌꇗꁧꃤꃅꌠꀻꎆ,ꊋꀥꇱꄉꉌꇗꁧꃤꃅꌠꎀꍹꏲꂠ。ꑗꊈꑗꇖꌤꃅꌠꏦꏲꌠꄹꎆ。ꃹꅼꃅꐮꄙꐨꏟꃆꏈꑘꇁꀦꇬꄉꋊꑣ、ꀉꑌꑵꇬꈴꄉꋊꑣ、ꊱꁨꃅꋊꑣꌠꄹꇙ。ꊋꀥꇱꄉꐧꋦꌤꃅꊿꁥꌠꂘꄻ,ꌐꑘꃅꁧꃤꃅꌠꑟꐨꉀꐕ。

ꊯꇖ、ꏤꈉꈐꃅꂽꄻꐛꋍꉐꈎꐛꌠꉈꈽꁻꌐꃅꇫꑟ，ꊇꁧꀊꂥꃅꇩꐏꌋꆀꂽꐛꏀꈴꌠꄹꎆ

ꇩꐏꄻꈫꈈꌠꌋꆀꂽꄻꀉꇨꌠꆹꍏꇩꈁꏦꐛꏀꈴꌠꄐꇐꏤꁈꄘꄏꅍꉬ。ꑮꏣꀻꂽꇨꉪꇐꃄꌬꈴ,ꃅꋊꀊꏀꋎꌠꂽꌤꄐꇐꏤꁈꌐꏦꃄꌬꈴ,ꄈꏓꂱꂽꏭꀋꎪꃅꏲꂠꌠꌭꈬ,ꏮꊈꍗꑮꆽꎍꄹꏦꃄꌬꈴ,ꇩꐏꌋꆀꂽꐛꏀꈴꌠꀊꏀꌠ“ꌕꁘꃅꈴ”ꌠꄐꇐꏤꁈꇬꈴꄉ,ꍔꍞꌌꂽꋈꄻ、ꄺꀱꄉꂽꄻꀉꇨ、ꈆꑪꇮꇐꌌꂽꄻꀉꇨ、ꌧꊿꌌꂽꄻꀉꇨ、ꏦꃤꇬꈴꄉꂽꏱꄻꌠꄹꎆ,ꋍꁁꏯꆏꉈꈽ、ꋍꁁꏯꆏꌉꊭꌉꄐ、ꋍꁁꏯꆏꋈꄻ,ꐳꃅꏸꏧꃅꐙꈴꌗꃅꐙꀑꊋꃅꐙꌠꐮꏓꐊꄉꀻꎆ,ꇩꏤꌅꀨ、ꋬꂻ、ꀻꎆꈲꁧꐏꁇꄐꇐꏤꁈꄐꊋꉀꐕ。

（53）ꐳꃅꂴꅑꌉꈿꊋꃤꋈꄻ。ꄐꇐꏤꁈꇷꇋꊋꃤꄻꀉꇨ,ꅉꆺꑭꊂꄐꇐꏤꁈꐮꆽꏣꌋꆀꎍꐽꌠꀧꌋꃅ。ꀊꏀꁁꏯꊈꏀꌉꈿꊋꃤꄉꈁꐥ、ꃶꐚꃅꌉꈿꃅꐙꌠ、ꉻꑫꃅꀻꎆꌠꄹꎆ,ꐳꃅꊿꀋꐥꀑꊋꌉꈿꊋꃤꌋꆀꉇꁏꊋꃤꋈꄻ,ꊋꀥꇱꄉꋊꃅꐥꌠꌉꈿꊋꃤꊐꐕꄺꀱ。ꈄꏍꈴꌗꉻꑫꋈꄻꃄꌬꌠꏓꇲ,ꊋꀥꇱꄉꃷꁨꊫꌐꅐꀦꀖꁉꌫꄻ,ꀑꊋꃅꐙꌠꂽꌤꉻꑫꏓꄻ。ꐳꃅꐛꏀꈴꌠꊂꇲꌠꋈꄻ。ꇩꐏꀻꎆꌠꋉꃆꀉꒉꀊꂾꌠꃄꌬ,ꐳꀥꇱꄉꇩꐏꈆꑪꇮꇐꏀꀺꌠꌋꆀꇮꇐꂴꅑꌠꆹꏮ,ꐳꃅꇇꌭꉁꈾꂴꅑꌠꀻꎆ。ꂽꌤꊾꊋꅐꀦꏱꁈꄹꏦꄻꃪ,ꂽꌶꅉꌶꅉꀞꊿꉗꊿꂘꌠꑟꐨꉀꐕ,ꊇꁧꀊꂥꌐꑘꃅꐙꌠꀊꏀꉹꌠꂽꌤꌧꊿꁥꄺꂡ。ꂽꌤꌧꇗꐛꏀꈴꌠꄹꎆꋉꃆꃄꄻ。ꃹꅼꃅꄐꇐꏤꁈꌋꆀꌉꈿꌠꄐꄻ,ꏟꈯꃅꃶꐚꃅꌉꈿꃅꐙꌠꂽꌤꁰꍋꌠꄹꎆ,ꊋꀥꇱꄉꌉꈿꊋꃤꉻꑫꏓꐛ,ꌉꈿꊋꃤꋈꄻꌋꆀꌬꈧꈁꏦꏀꀺ,ꂽꌤꉈꈽꄐꌐꐨ、ꑴꇙꐨ、ꎵꄻꊋꃤꄻꀉꇨ。

（54）ꂽꌤꏱꄻꐛꏀꈴꌠꄹꎆ。ꏓꂱꂽꏲꂠꏱꄻꏦꉻꉺꏦꄻꉾꃪ,ꐮꐊꌉꈿꉻꑫꋊꄻꉾꃪ。ꄐꇐꏤꁈꏲꂠꌠꊋꀥꇱꌋꆀꄻꃪ,ꃹꅼꃅꌉꈿꋈꄻꊭꄎꌠꏓꇲ,ꌉꈿꈉꐨꈻꏁꌠꄻꀉꇨ,ꏲꂠꏡꁈꇇꁈꏀꀺ,ꂽꌤꉻꑫꏮꈴꇿꋌꂿꄐꌋꆀꇩꐏꅐꀦꌫꄻꇿꋌꈲꁧꉀꐕ。ꊋꀥꇱꄉꀉꒉꀊꂾꃅꁈꏤꌠꅱꇖꄤꎖꌋꆀꀉꒉꀊꂾꌠꐘꑘꍞꏲ,ꂽꌫꎆꄐꌗꏲꂠꄺꀱꌠꄹꎆ,ꂽꌤꃻꄻꄹꏦꄻꃪ,ꂽꋈꄻꌠꏓꌗꄤꎖꉻꑫꄻꉾꃪ,ꐊꑷꃅꈪꑌꃅꂽꋈꄻꌠꌐꏦꃅꑞꅉꑟ,ꈲꁧꀊꂥ、ꀨꊰꀁꂥ、ꐪꊛꄉꀻꎆꉆꌠꈝꃀꍬ。ꐪꊛꄉꃹꅼꃅꍔꍞꏱꄻꁰꍋ,ꋊꃅꐥꌠꃅꇏꉾꃪꌠꍔꆙ,ꊋꀥꇱꄉꀋꉬꀋꉆꌠꉹꑘꌋꆀꁁꏯꋊꍬꏱꄻ。ꃹꅼꃅꂽꏦꏲꋈꄻꌠꄹꎆ,ꊋꀥꇱꄉꏦꇗꄹꏦꇲꁵꌋꆀꃄꌬꍞꊟ,ꍏꇩꐛꐨꂽꌤꏦꏲꉻꑫꄻꉾꃪ。

（55）ꋍꃱꃅꐙꌠꇩꏤꄐꇐꏤꁈꉻꑫꌋꆀꄐꊋꄻꈫꈈꉀꐕ。ꃹꅼꃅꂽꃅꄷꐂꄉꄺꀱ,ꂱꑱꃅꎁꃅ、ꑖꑟꃅꐊꃅ、ꏦꐛꊱꁨꌠꂽꃅꄷꐂꄉꌤꃅꌠꐛꊂꏓꄻ。ꐳꃅꏀꄓꁁꏯꄐꇐꏤꁈꄐꊋꋈꄻ,ꊈꏀꒃꅐꊋꃤꌋꆀꊈꏀꌉꈿꊋꃤꇿꋌꀊꂥꃅꐮꏓꐊ、ꐮꏯꉜꄉꈺꇙꌠꄹꇙ。ꇩꐏꈆꑪꇮꇐꇮ꒧ꉻꑫꂴꅑꌠꋈꄻ,ꇩꐏꈆꑪꇮꇐꇮ꒧ꄐꉻꄻꃪ,ꂽꌋꆀꉹꁌꎕꏦꌬꈴꌠꄹꎆ。ꇩꐏꋈꄻꂽꌤꈉꐨꄛꇰꌠꌋꆀꂽꃅꄷꐯꊛꌠꊋꀥꇱ,ꅉꃀꉁꈾꀉꒉꀊꂾꌠꐊꑷꃅꇩꐏꇖꐨꃄꌬꈴꌠꄹꇙ,ꊋꀥꇱꄉꇩꐏꄐꇐꏤꁈꂴꄻ。ꐳꃅꇩꐏꄕꊪꄐꊋꋈꄻ,ꊋꀥꇱꄉꊁꊭꊁꄐꊋꃤꋈꄻ,ꊋꀥꇱꄉꐛꏀꃅꋮꎿꃀꃅꈯꐏꁇꌠꋈꄻ,ꄈꍔꂽꏢꍤꉹꁌꊋꏓꄉꃅꋮꐏꈬꌠꄹꎆ。ꃹꅼꃅꏓꂱꈁꐥꌠꃅꇩꐏꉙꂘꌠꃅ,ꂽꍔꂽꂱꋯꑌꌠꄻꈫꈈ。

ꊯꉬ、ꄈꑭꊂꇩꏤꑭꊂꊿꋅꈁꐥꌠꏓꂱꃅꋯꑌꌊ“ꊯꉬꉬ”ꄐꎖꌠꃅꇫꑟꌠꎁꃅꉈꈽ

ꄈꐊꑷꃅꏲꂠꌠꌭꈬꌋꆀꊋꀥꇱꌠꆹꍏꇩꈁꏦꐛꏀꈴꌠꄹꎆꌠꊇꅉꄉꀧꅍꉬ。ꄈꅿꑴꅉꇝꂱꌠꌌꐧꋦꇝꂱꌠꄐꏁꌠꌭꈬ,ꌦꀳꏿꄉꐊꑷꃅꏦꇨꃅꄈꏱꄻꌠꄹꎆ,ꄈꍔꍞꏲꂠꊋꃤ、ꉪꇐꄐꏁꊋꃤ、ꉹꁌꊥꇫꊋꃤ、ꐧꋦꇳꍝꊋꃤꄻꀉꇨ,ꄈꎆꏣꐧꋦꀻꎆꌠꇬꏲꂠꌠꄐꊋꌋꆀꑟꐨꉀꐕ,ꍏꇩꈁꏦꐛꏀꈴꌠꄹꎆꌠꎁꃅꊋꃤꀉꇨꌠꏓꋧ。

（56）ꄈꍏꑷꏓꋧꋍꃱꃅꏲꂠꌠꌭꈬꌋꆀꊋꀥꇱ。ꄈꍏꑷꀉꒉꀊꂾꃅꁈꏤꄐꁆꃅꑞꅉꑟꉺꏦꄻꉾꃪ,ꐰꉎꐮꈴ、ꃄꌬꊋꑌꌠꄉꀧ。ꐪꊛꄉꄈꅿꏀꀺꌧꇗꌊꉪꇐꏓꋍꃱꃅ、ꉪꐨꏓꋍꃱꃅ、ꃅꐨꏓꋍꃱꃅ。ꄈꈒꇓꋯꁦꌠꀻꎆ,ꋯꁦꏓꁨꄹꏦꄻꉾꃪꌋꆀꃅꑞꅉꑟ,ꈆꑪꃅꁈꏤ、ꋯꁦꃅꁈꏤ、ꏦꃤꇬꈴꄉꁈꏤꌠꌭꈬ。ꎃꊒꌠꊾꌬꍝꄎꐨꌭꈬ,ꍔꍞꎕꏦꄻꀨꇬꄉꌠꌭꈬ,ꏱꄻꊌꐨꉜꐨꎃꊒꌠꑌꈬꌋꆀꃄꄻ,ꇥꀯꍤꎖꈋꍣꉺꏦꄻꉾꃪ,ꀋꃅꄉꅍꃅꀋꄐꌠꇥꀯꋊꄻ,ꏲꌋꇥꀯꄩꆹꀏꇁꉆꌠꅉꀕꃅꐙꌠꄹꎆ。ꀉꇨꃅꉙꂘꁰꍋꌋꆀꃄꄻꄜꎟ,ꇥꀯꁥꌠꐛꏀꈴꌠꋈꄻꄐꊋꉀꐕ。ꏦꇨꃅꏲꂠꀊꅼꃅꁌꒉꌠꐮꐊꐙ、ꊋꊡꏢꑲꌠꐯꇯꉜꁨ,ꇥꀯꁥꌠꈒꒆꇙꊋꌋꆀꉻꄜꍄꑐꊋꃤꄖꄑ。ꋍꑞꋍꁆꏯꅉꂫꊐꌠꄈꎀꍹꋈꄻꌠꏓꇲꄹꎆ,ꄈꎀꍹꍔꍞꂿꄐꌋꆀꎀꍹꂿꄐꄻꀉꇨ,ꄈꑼꂴꅑꌶꀠꂿꄐꋊꇤꅐꇁ。ꌦꀳꏿꄉꍏꑷꏤꐪꉆꐘꉌꊈꃅꑞꅉꑟ,ꅱꈯꃅꋍꑞꋍꑵꃅꇏꀋꎃꌠꏢꇋ,ꃅꇏꋈꄻꌠꅉꀕꃅꃅꀊꉗꃅꇿꋌꐥꌠꄹꎆ。ꃹꅼꃅꇶꏦꉪꏦꏱꄻꄉꅉꂫꊐꌠꎁꃅꀵꃤꊨꒊꌠꌤꃅ。ꄈꌋꆀꇩꏤꍞꊟꉻꑫꄻꉾꃪ,ꊋꀥꇱꄉꌅꈌꁆꄻ、ꏮꈴꌠꋊꍬꌋꆀꍞꊟ。ꍹꈔꌠꏭꁏꌠꐥꍂꃅꈝꃀꇬꐺꌠꃱꐚꏟꈯꌠꄝꀋꊰ,ꋍꉻꃅꍹꈔꀋꀬ、ꍹꈔꀋꄐ、ꍹꈔꀋꏾꌠꄹꎆ,ꏟꈯꃅꍹꈔꌠꏭꁏꉈꈽꌠꈢꇓꀖꃅꃅꌠ、ꀊꉗꃅꃅꌠ、ꉻꄜꃅꃅꌠꃅꋒ。ꃅꇏꐙꎴꑌꇐꎃꊒꌠꍔꍞꒆꉻꄺꂡ。

（57）ꐧꋦꉪꏦꋯꁦꏦꏲꋈꄻꌠꄹꎆ。ꀋꇙꀋꑐꃅꍏꇩꐛꐨꐧꋦꉪꏦꍔꍞꀻꎆꈝꃀꍬ，ꄈꅿꏲꂠ、ꏓꂱꑱꏲꃥꌋꄻ、ꏦꈴꇩꏲꌠꊜꋽꃅꏓꋍꃱꃅꌠꌭꈬ，ꈴꎁꇬꃅꏓꂱꋯꁦꌠꀻꎆ，ꍏꇩꐛꐨꐧꋦꉪꏦꏦꏲꉻꑫꄻꉾꃪ。ꏓꂱꁧꎁ꒜ꀉꒉꄹꏦꌭꈬꋒ、ꄻꉾꃪꋒ、ꃄꌬꋒ，ꇩꏤꌤꏲꅉꏦꃤꇬꈴꄉꌅꈌꌬ、ꃅꎁꃅꌠꄉꀧ，ꏓꂱꉹꁌꋯꁦꌅꈌꈲꁧ、ꏦꊒꌅꈌꈲꁧꀧꌋꃅꌋꆀꃅꇫꑟꌠꄉꀧ。ꍏꇩꇭꍣꄈꏲꂠꌠꄈꀉꑌꂷꇷꃅꌠꌋꆀꍔꍞꋮꒉꄹꏦꌭꈬꌋꆀꄻꉾꃪ，ꏓꂱꍔꑠꌐꁨꋮꒉꏲꉻꃅꄉꌠꂿꄐꋊꇤ，ꊋꀥꇱꄉꋍꑞꋍꑵꋮꒉꈴꈜꋮꐊꐮꐊ，ꋮꒉꋯꁦꌠꀊꐯꈭꃅꀉꑌꊐꃅꄹꏦꈴꃅꀻꎆꌠꄹꎆ。ꅉꂫꊐꌠꋯꁦꄹꏦꄻꐛꒆ，ꏓꂱꏦꃤꇬꈴꄉꅉꂫꊐꌠꄉꉻꌤꆿꌋꆀꉻꈲꌤꑘꏱꄻꌠꏦꀧ。ꉹꁌꉪꐨꈺꌬ、ꉹꁌꀑꁮꐨꏓꊭꌠꌤꃅꉺꏦꄻꐛꒆ。ꀊꅰꉾꃪꃅꇪꉼ、ꇭꏾꄨ、ꌋꅪꐊꏑꉼꑠꉹꁌꏓꉻꎀꍹꂿꄐꋊꇤ，ꊋꀥꇱꄉꅐꑘꇮꃅꊿꁥꂘꄻ、ꀊꉘꌠꏀꀻꎆ、ꌋꅪꀊꉘꌤꑘꀻꎆꌠꏱꁈꏦꀧ。ꃰꊿꌅꈌꌤꑘꐊꑷꃅꀻꎆꌠꊥꎆ。ꀉꒉꃅꏓꋍꃱꃅꁁꏯꌤꃅꐛꊂꄻꉾꃪ，ꀊꐯꈭꐯꀊꐯꈭꌠꇩꉂꊋꏓꋍꃱꃅꁁꏯꄻꈫꈈꌋꆀꀻꎆ。ꍏꉸꊿꋅꏓꐊꄜꉪꐨꄻꈫꈈ，ꍏꉸꊿꋅꏓꐊꄜꋈꄻꌠꄹꎆ。ꉪꇩꏤꑇꇐꍏꇩꃤꐛꌠꃅꍜꌭꈬ，ꑇꇐꌤꆿꏱꄻꌠꏦꏲꈴꌠꊋꀥꇱ。ꐊꑷꃅꄈꅿꇩꉈꀀꌠꃺꑌꌤꆿꏱꁈꃄꌬꈴ，ꀊꅰꉾꃪꃅꇩꉈꀀꌠꃺꑌꉌꏓꊋꏓꎼꇁ。

ꐊꑷꃅꏦꈴꇩꏲꌠꌭꈬ，ꋮꐊꄉꈆꑪꃅꏦꃤꏤꄻ、ꏦꇨꃅꏦꃤꍬꌬ、ꀋꈐꀋꉈꃅꏦꃤꌫꄻ、ꋍꏅꃅꏦꍬꌠꄹꎆ。ꊋꀥꇱꄉꏦꃀꏦꃤꃄꌬꌋꆀꍞꊟ，ꇩꏤꏦꏲꏓꋍꃱꃅꌠꄹꏦꀧꌋꃅꌠꉺꏦꄻꉾꃪ。ꏦꃤꏤꄻꄐꎖꌋꆀꏦꃤꏤꄻꍤꄻꌠꊋꀥꇱ，ꏦꃤꏤꄻꊇꁧꉀꐕ。ꀉꇨꃅꏦꏲꍔꃚꋈꄻ，ꐊꑷꃅꏲꑘꏦꐛꁱꐘꅺꇰꁱꄀꍤꄻꌠꃅꑞꅉꑟ，ꃶꐚꃅꏲꑘꐯꀥꌠꂥꀘꉺꏦꄻꉾꃪ。ꍔꃔꌤꃅꃷꂷꃅꐙꌠꐽꈉꋈꄻꌠꄹꎆ，ꀉꇨꃅꌤꏲꅉꐂꄉꏦꃤꍬꌬꏦꃤꌫꄻꌠꋮꐊꌋꆀꍞꊟ。ꏦꃤꌫꄻꌅꈌꏮꈴꌠꋊꍬ，ꏦꃤꌫꄻꀋꈐꀋꉈꌠꃅꇫꑟꌋꆀꈋꍣꉺꏦꄻꉾꃪ，ꏦꃤꌫꄻꍞꇽꀋꈐꀋꉈꐨ、ꎍꐽꐨ、ꋦꒉꐨꉀꐕ。ꏦꍤꍞꊟꌠꄻꀉꇨ，ꉻꈲꅇꎹꌠꊋꀥꇱ。ꏦꃤꇬꈴꄉꊿꇭꀧꌅꈌ、ꁨꇐꌅꈌ、ꊾꊈꌅꈌꏦꀧ，ꎆꏂꑘꃆꂮꐥꌠꏦꃤꍬꌬꏦꐛꌠꎴꈲꉺꏦꄻꐛꒆ，ꇗꐆꏦꐆꄉꌞꃅꄷꄉꏦꃤꍬꌬꌠ、ꈲꎹꐨꐥꃅꏦꃤꍬꌬꌠꄴꏮꌋꆀꄺꀱ。ꇩꏤꃄꌬꏦꉻꄻꐛꒆ，ꇿꋌꐥꃅ“ꃄꌬꊋꋠ”ꌠꌤꃆꂥꀘ。ꐳꃅꉇꉻꃆꂮꐥꌠꏦꏲꉻꑫꌋꆀꄐꊋꋈꄻ，ꇩꏹꃼꇇꌤꆿꉉꋊ、ꉉꇽ、ꅇꎹꑠꉺꏦꄻꐛꒆ。ꊋꀥꇱꄉꏲꌋꇥꀯꏦꃤꇬꈴꄉꌤꀞꍞꊟꍤꄻ，ꏓꇱꐨꐥꌠꏦꏲꈋꍣꌤꃅꉺꏦꄻꉾꃪ。ꏦꏲꐧꋦꋈꄻꌠꄹꎆ，ꐧꋦꑭꊂꃅꏦꏲꁌꒉ、ꏦꋪꍬꌬ、ꏤꐪꉜꁨ、ꀋꈐꀋꉈꌠꀧꌋꃅꌠꋦꈭꉾꃪꌠꄺꑣ。

（58）ꑣꇤ、ꀎꂱꀊꉗꃅꌄꆣꎍꐽꌠꊥꎆ。ꀋꇙꀋꑐꃅ“ꋍꇩꑍꏦ”、“ꑣꇤꊿꑣꇤꏲ”、“ꀎꂱꊿꀎꂱꏲ”、ꀊꂥꃅꊨꏦꏲꌠꌐꏦꃄꌬꈴ，“ꇩꉂꊿꑣꇤꏲ”、“ꇩꉂꊿꀎꂱꏲ”ꌠꏥꏦꃄꌬꑞꅉꑟ，ꑣꇤꀎꂱꏦꃤꇬꈴꄉꏱꄻꌠꇿꋌꉀꐕ，ꑣꇤꀎꂱꎆꏣꐧꋦꀻꎆꌠꊥꎆ。ꑣꇤꀎꂱꀊꅰꉾꃪꃅꇩꏤꀻꎆꃅꇴꄉꉻꇬꐊꈽꌋꆀꁧꃤꃅꌠꊋꁈꄏ，ꑣꇤꀎꂱꌋꆀꅔꈐꎆꏣꃼꇇ、ꈆꑪꇮꇐ、ꃰꊿꁱꀕꑠꇷꃅꌠꊋꀥꇱ，ꑣꇤꀎꂱꀀꊿꁳꅔꈐꄉꀻꎆꇬꌋꆀꇫꋦꇬꃅꌒꑽꌒꎻꌠꏱꁈꏁꁈꄻꉾꃪ。ꑣꇤꀎꂱꇱꄓꁍꇩꊫ、ꋧꃅꌋꆀꐮꈴꌠꂱꎆꅑꐨꐋꀋꌡꌠꌋꆀꂿꄐꀋꂿꑘꌠꋊꇤ，ꑣꇤꇩꏹꎆꒉꎆꇁ、ꎿꃀꈴꃅꈯꈴꎞꎭ、ꃼꇇꈯꄜꉆꈉꄻꈫꈈꉀꐕ，ꑣꇤꇩꏹꏀꀺꈆꑪꇮꇐꈯꄜꋈꄻꌠꊋꁈꄏ，ꀋꆏꃅꀎꂱ“ꈯꄜꋍꂷ、ꐽꈉꋍꂷ、ꅉꁍꋍꂷ”ꌠꂿꄐꄇꇖꀕꃅꄛꑣꅐꇁ，ꀎꂱꎆꏣꄉꄐꃅꀉꑌꑵꃅꀻꎆꌠꄹꇙ，ꑣꇤꀎꂱꇩꏹꌧꊿꀉꇨꌠꏓꋧꅉꀉꇨꌠꄺꑣꌠꊋꁈꄏ。

（59）ꎿꋮꑍꄷꐮꃆꂮꄮꐽꃅꀻꎆꌠꄹꇙ、ꁍꇩꏓꋍꃱꃅꌠꌤꑘꀉꒉꌠꄹꎆ。ꃹꅼꃅꃅꋊꀊꏀꋎꌠꄈꄠꃪꌤꃆꂥꀘꌠꉻꄜꄐꁈꃄꌬꈴ，ꏟꈯꃅ“ꄠꃪꄂꋦ”ꁷꐞꊋꃤꏭꇇꇩꍈ，ꉇꉻꊋꃤꃸꆽꇁꌠꏭꁏ，ꄠꃪꎿꃀꄮꐽꎍꐽꌠꀧꌋꃅ，ꏟꈯꀕꃅꎿꋮꑍꄷꐮꃆꂮꀨꇺꌅꈌꒃꇇꈐꊐꄉ。ꃹꅼꃅꎿꋮꑍꄷꐮꈴꇷꃅ，ꐯꇯꍏꉸꁱꀕꊪꊛꍔꆙ。ꊇꁧꀊꂥꃅꎿꋮꑍꄷꐮꏓꐊꄉꀻꎆꌠꌡꀠꃄꁕꋈꄻꌠꄹꎆ，ꊋꀥꇱꄉꅐꑘꇷꃅ，ꎿꋮꑍꄷꎆꏣꇷꃅꌠꄹꇙ。ꄠꃪꃺꑌꐯꌟꃅꈲꊌꌠꏱꁈꃅꑞꅉꑟ，ꄠꃪꃺꑌꅔꃀꄉꌶꄻ、ꌤꃅ、ꇫꋦꌠꎁꃅꇎꏦꀊꅰꃅꉾꃪꌠꀹꄻꄉ，ꎿꋮꑍꄷꃺꑌꁳꀊꅰꃅꐥꌒꄻꌒꇁꎻ。

（60）ꃰꊿꊫꂫꐮꐊꄜꏓꄻꌠꄹꇙ。ꐥꊯꊱꁨꌠꋧꃅꀉꑌꊧꃅꐙꌠ、ꈲꈴꐯꏆꌠꎆꏣꅉꆺꈴꌠꄕꊪ，ꅉꆺꑭꊂꐋꀨꐮꃆꂮꈄꏍꍔꐯ，ꇩꏹꐮꃆꂮꀊꏀꉹꌠꏓꄻꌠꄹꇙ。ꈭꇍꀻꎆꐮꏓꐊꌠꄻꃹꅼ，ꐯꇯꋬꂻꌠꄻꀉꇨ，ꄐꇐꏤꁈꐮꉌꒊꌠꄻꈫꈈ，ꈭꇍꊫꂫꐮꐊꄜꏓꄻ。ꇩꏤꀉꒉꌠꐮꃆꂮꉻꄜꎍꐽꌠꀧꌋꃅ，ꃹꅼꃅꀻꎆꇰꌠꇩꏤꌋꆀꐮꋯꑌꇷꃅ，ꅉꆺꑭꊂꀻꎆꄕꊪ、ꅉꆺꑭꊂꋬꂻꄕꊪ、ꅉꆺꑭꊂꌧꑳꄕꊪ、ꅉꆺꑭꊂꏱꄻꄕꊪꌠꃅꑞꅉꑟ，ꇩꏹꐥꀹꄐꏁꌊꀊꅰꃅꀋꈐꀋꉈꋭꋽꌠꃅꍜꁁꏯꉜꄉꀻꎆ。ꅉꆺꑭꊂꒈꂪꐊꏑꑴꇨꌠꊋꁈꄏ，ꉇꉻꇇꀨꌠꊋꃤꁦꎆꇱ，ꇩꏹꄉꉻꅐꇐꀊꅰꀉꑌꃅꇲꁵ。ꏟꈯꃅꊋꏗꇨꏗꊋꅸꏿꌠꃅꐨꏭꁏ，ꇩꏹꐽꊯꑗꉬꌠꀧꌋꃅ，ꇩꏤꈁꐥꌠꏓꂱꐯꇯꃤꉬꌠꈲꁧꀧꌋꃅ。ꐧꇁꃰꊿꐯꇯꐥꌠꁌꐨꍔꆙ，ꀊꉗꃅꄮꐽ、ꁊꈴꃅꋬꂻ、ꐯꇯꌄꆣ、ꁉꃑꐯꏆ、ꁦꎴꎔꃨꌠꋧꃅꋈꄻꌠꄹꇙ，ꃰꊿꊫꂫꐮꐊꄜꏓꄻꌠꎁꃅꍏꇩꑆꊋꅐꌞ。

（61）ꋒꐯꋒꃅꐧꋦꑭꊂꃅꇶꇤꊋꇤꄉꍏꇩꈁꏦꐛꏀꈴꌠꋈꄻꌠꏣꀋꑌꐨꑴꇙꐨꀹꄻꐨꄖꄑꎼꇁ。ꋌꃢꐊꈴꃀꉌꊈꇬꈴꄉ，ꇩꏤꌋꆀꃅꄷ“ꊯꉬꉬ”ꄐꎖꐱꀨꌋꆀꌐꐘꄐꎖꑠꏤꄻꄉ，ꉆꈉꏤꄻꊒꌸ、ꄹꊨꊨꄅꃱꉻ、ꂿꄐꐯꅋꐮꑣ、ꋍꃱꃅꐯꊛꌠꇩꏤꄐꎖꉻꑫꏓꐛ。ꀉꇨꃅꄐꎖꃄꌬꌠꍞꎖꄤꎖꌋꆀꍞꊟ，ꏱꁈꋮꄮꌠꌋꆀꌤꃅꋮꐊꌠꉺꏦꄻꐛꒆ，ꄈꍏꑷꁈꏤꄐꁆꌠꃅꑞꅉꑟꌠꄉꀧ。ꑘꃅꁌꒉ、ꌧꇐꁌꒉ、ꌧꊿꁌꒉ、ꀹꄻꁌꒉꌠꌐꏦꃄꌬꈴ，ꐧꋦꑭꊂꃅꌤꃅꑘꀺ、ꏀꀺꀹꄻꌠꍄꑐꊋꃤꄖꄑ，ꑞꄐꌠꑞꃅ、ꑞꌧꌠꑞꃅ、ꋍꏅꉌꏓꋍꂷꃅ、ꊋꏓꁨꆹꌠꐛꊂꍅꁍꀕꌠꏓꐛ。

ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꐯꇯꊋꇤ，ꀋꆏꃅꍏꇩꈁꏦꐛꏀꈴꌠꌌꐊꑷꃅꇩꏤꀉꇨꌠꋈꄻꌠ、ꊿꋅꀱꌄꆣꇁꌠꌤꑘꇰꀋꃀꌠꄹꎆꌠꐛꊂꀊꏀꌠꀹꄻꌶ。